Yohanese eni Sulate Nomore Luare
Lepate Menai
Kena sulate meije Yohanese ileki, be sulate meije bei ruai. Ileki be: “Sulate meije bei au, jemate toini esi elake.” Kena pasale 1:1 Yohanese iombe sulate meije inatue ete matabinane sae kai eni nanaru. Po tamata bokala rebe esi atetuke Alla Eni lepataru esi ombe sulate meije esi tujuane ete matabinane pise inate mo po ete tamata Kristene toini: matabinane pise inate mere batuke umpama neka. Po tamata leini me esi ombe, “Tinai, Yohanese inatue sulate meije ete inai kai eni nanaru.”
Yohanese eni tujuane, sulate meije eono tamata Kristenaru lalesi leke esi oki lomai (ayate 6), kai iahnausi leke esi keta bei tamata maka rekwa Alla Eni lepataru, rebe esi atetuke hnaune nkenale more (ayate 7, 9).
1
Hlamate
1-3
1 Inate ale. Hlamate ete ale kai amu anaru. Alla Ibitikemu peneka.
Au Yohanese, au leki sulate meije. Aure jemate toini esi elake. Au oki pusumi titinai. Batuke ruaku oki imi mo po pusue tamata rebe esi rekwa hnauna nkenalaru esi oki imi lekwe. 2 Le hnauna nkenalaru me ite lalema peneka kai ite lulu hnauna nkenala meru rame eti pela.
3 Au kotie ete itea rebe lulu Alla Eni hnaune nkenale kai rebe oki tamata makete, leke Alla Amate kai Eni Nanae Tuhane Yesuse Kristuse esi riluke misete ete ite noma, lalesi noa ite kai esi ono ite lalemaru ndene noma.
Hlaleke loko Kristuse Eni hnaunaru rame
4-11
4 Lalekue ndina titinai le au rekwa ina amu kwetelaru leini, esi ono lulu hnaune nkenale rebe Alla Amate Iahnau itere. 5 Bei mere hoko au kotie bei ina ale, leke ite pusuma suke oki lomai rame. Meije pleta beluke mo. Pleta meije ite pusuma lene peneka kena ite hlaleke loko Alla memenaije sa. 6 Oki lomaije elere: suke ite hidupe lulu Eni hnaunaru. Hnauna rebe imi lene kena imi hlaleke menai sare eombe imi ruere suke oki lomai.
7 Au leki meije ete imi le tamata nloena bokala esi keu papelake otoi mei nusa peneka kena atetuke hnaune rebe tinai mo. Esi ombe Yesuse Kristuse Iono tamata kena Iluake mei nusare mo. Sie meru tamata nloene kai esi musu kai Kristuse. 8 Bei mere hoko imi raka mimise leke imi hlaleke loko Tuhane Yesuse hleke yake. Sepo mo hoko ami lepae Sou Misete ete imire esi guna sae mo. Raka mimise leke Alla riluke pusue misete rebe Italukele ete imire.
9 Tamata rebe iono lulu Kristuse Eni hnaunaru rame mo po lulu hnaune makete, tamata mere iesa kai Alla mo. Tamata rebe iono lulu Kristuse Eni hnaunaru rame hoko iesa kai Alla Amate kai Eni Nanare lekwe. 10 Hoko sepo tamata esi luake, esi atetuke hnauna makete bei rebe Kristuse Iatetukele, imi trimai me imi luma yake pise beteke hlamate etei yake. 11 Le sire pine ibeteke hlamate ete tamata ele mere, hoko iono neune sakesa kai tamata mere lekwe.
Lepate mulini
12-13
12 Au suka lepae bokala ete imi sa, po au noake, lepae kena sulate yake. Au suka titinai kena keu loko imi kai ruaku lepa kai imi, leke ite lalemaru ndina sakesa titinai.
13 Inate, kwalimu rebe Alla Ibitikni kena Eni nanae pende eni nanaru esi beteke hlamate ete ale.
Hlamate, Yohanese