Surat Ni Paulus Boni
FILEMON
1
Taa' puntumbei
1-3
Yaku', ai Paulus, men nitarungku gause na pongololo'an i Kristus Yesus, ka' i Timotius utusta sa'angu' kaparasaya'an, munsurati i koo Filemon men kolingu', samba-sambamai balimang, ka' boni Apfia, utusta wiwine men sa'angu' kaparasaya'an, ka' boni Arkhipus, men sa'angu' palimangon tii kita, ka' bona jama'at men bakitumpu na laigaan.* Kol. 4:17
Sulano kaporean tia koratongan men ringkat na Alaata'ala Tamanta, ka' i Tumpu Yesus Kristus, surionmuu na tutuo'muu.
Lingu' ka' imaan ni Filemon
4-7
Sinampang yaku' mansambayangkon i koo, yaku' basukuur na Alaata'alangku gause yaku' rongor a imaawan ni Tumpu Yesus, ka' lingu'um na wiwi'na mian simbaya'ta parasaya. Sambayangkononku kada' poowawanta men sa'angu' kaparasaya'an sida munturangi pinginti'ianmuu na wiwi'na barakaat men isian na ko'onta gause i kita moto kantang tii Kristus. Nongorongor lingu'um na mian simbaya'ta parasaya, noangku beles tuu' ka' munsuri moonggor gause noana mian men simbaya'ta parasaya koo popobelesmo, utusku.
Pa'ase' ni Paulus kada' i Filemon mangalaboti i Onesimus
8-22
Ya'a mbali', gause kuasa ni Kristus yaku' sida momosuu' i koo mangawawau upa men tiodaa wawauoon, kasee yaku' sian mangawawau men koiya'a. Gause minginau' lingu'um iya'a, mbaka' porena yaku' tongko' mama'ase' na ko'oom. Yaku' i Paulus men langkai'mo, daa dauga'na nitarungku gause parasaya ni Kristus Yesus, 10 mama'ase' i Onesimus,* Onesimus: Aratina ngaan kani'i se', “isian kana'na”. na ko'oom. Ia koimo anakku tuu' men yaku' tausi na tarungkuan kani'i.* Kol. 4:9 11 Mbaripian, ia sianta kana'na na ko'oom, kasee koini'i ia isianmo kana'na na ko'oom ka' na ingku'.
12 Ia men kolingu'ku tuu', posuu'onku mule'kon na ko'oom. 13 Bookoi i ia taankononku itamo tii yaku' bo boloos mangkalesang i yaku' men dauga' na tarungkuan gause mengelelekon Lele Pore. 14 Kasee kalu noaam sian maloos, yaku' sian mantaankon i ia, kada' upa men pore, wawauoon tia noa maloos, alia paki-pakisaa.
15 Too i ia tongko' mamarere i koo kodi-kodi', kada' na kokomburi'anna ia sida mule'kon ka' dumodongo soosoodo tii koo pataka sidutu. 16 Ia amo'mo labotioon tongko' koi sa'angu' ata' gause i ia labimo iya'a. Ia utusta sa'angu' kaparasaya'an men kolingu' tuu'. Ai ia isianmo kana'na na ingku', upa mune' ka' na ko'oom. Ia kolingu' tuu', mau koi ata', ka' uga' koi utus men sa'angu' kaparasaya'an.
17 Kalu punsuriim se' i yaku' kani'i utuus sa'angu' kaparasaya'an, mbaka' pa'ase'onku kada' i ia uga' labotioon koi pangalabotiim i yaku'. 18 Kalu isian upa men sala' ia wawau na ko'oom, kabai se' tinonsamaya na ko'oom, daa i yaku'si a montololoki. 19 Yaku' i Paulus, nuntulis wurung kani'i tia limangku suungku: tia limangku suungku: Panduung ni Paulus nuntulis koiya'a kada' i Filemon parasaya ai Paulus se' tuutuu' ni Paulus suungna men bo mombontori samaya ni Onesimus. Yaku' a mombontori wiwi'na samayana. Sianta paraa popo'inau'onku na ko'oom se' i koo samayaon na ingku' na tutuo'om men u'uru koi sa'angu' mian Sarani.
20 Utusku! Laboti i Onesimus kada' i koo kumana' na ingku' men moto kantangmo tia Tumpu: Pa'ase'onku na ko'oom, porampot a noangku koi sa'angu' utus men moto kantangmo tii Kristus!
21 Mbali' suratku kani'i yaku' pakatu bo ko'oom, gause parasayaonku se' i koo bo mongololoikon pa'ase'ku. Inti'ionku se' i koo sabole mangawawau labi tia upa men pa'ase'onku kani'i.
22 Saliwakon iya'a, yaku' mama'ase' moki toropoti sa'angu' tambin na laigaan bo tuukanku. Ooskononku, Tumpu sabole mangalaboti sambayangmuu wiwi'kuuna, ka' mungule'kon i yaku' soosoodo na ko'omuu.
Taa' pangkakabusian
23-25
23 Ai Epafras, simbaya'ku nitarungku gause na pongololo'an i Kristus Yesus, miki tundunkon salam na ko'omuu.* Kol. 1:7; 4:12 24 Koiya'a uga' samba-sambangku balimang, ai Markus, Aristarkhus, Demas, ka' i Lukas miki tundunkon salam na ko'omuu.* Tun. 12:12, 25; 13:13; 15:37-39; 19:29; 27:2; Kol. 4:10, 14; 2Tim. 4:10-11
25 Sulano kaporeanna i Tumpu Yesus Kristus surionmuu na tutuo'muu.

*1:2 Kol. 4:17

*1:10 Onesimus: Aratina ngaan kani'i se', “isian kana'na”.

*1:10 Kol. 4:9

1:19 tia limangku suungku: Panduung ni Paulus nuntulis koiya'a kada' i Filemon parasaya ai Paulus se' tuutuu' ni Paulus suungna men bo mombontori samaya ni Onesimus.

*1:23 Kol. 1:7; 4:12

*1:24 Tun. 12:12, 25; 13:13; 15:37-39; 19:29; 27:2; Kol. 4:10, 14; 2Tim. 4:10-11