Dehet Banan deng Lamtua Yesus
muding
Matius
1
Upu kia-kaons deng Lamtua Yesus
(Lukas 3:23-38)
1-2 Buk ni dul deng Yesus Kristus, Atuling man Ama Lamtua Allah hidan meman son deng lolo hmunan nu le tunang maa ka. Un na mo, laih Daud nol upung Abraham in hua-koet.
Kilan deng upung Abraham lako lius laih Daud tam, bataꞌ hngul aat. Lamtua Yesus upu kia-kaon nas elia:
Abraham hua Isak,
Isak hua Yakob,
Yakob hua Yahuda nol kaka-palin nas,
3 Yahuda hua Peres nol Sera (oen inan na, ngala Tamar),
Peres hua Hesron,
Hesron hua Ram,
4 Ram hua Aminadab,
Aminadab hua Nahason,
Nahason hua Salmun,
5 Salmun hua Boas (Boas ina ka, ngala Rahab),
Boas hua Obet (Obet ina ka, ngala Rut)
Obet hua Isai,
6-11 Isai hua Daud,
Ninin deng laih Daud lako pes bangsa Israel las tom in soleng lakos se Babilon na ka, bataꞌ hngul aat pait, elia:
Daud hua Salomo (Salomo ina ka, hmunan nu Uria sapa)
Salomo hua Rehabeam,
Rehabeam hua Abia,
Asaf hua Yosafat,
Yosafat hua Yoram,
Yoram hua Usia,
Usia hua Yotam,
Yotam hua Ahas,
Ahas hua Heskia,
Heskia hua Manase,
Amos hua Yosias,
Yosias hua Yekonya nol un palin nas se dedeng oen tom in soleng lakos se Babel la.✡ Lahi-lahi las Buk nomer dua la 24:14-15; Dehet deng Bangsa Israel nol Bangsa Yahuda lalis dua la 36:10; Yermia 27:20
12-16 Dedeng oen tom in soleng lakos se Babel maa pes Yesus sa, muik bataꞌ hngul aat pait, elia:
Yekonya hua Selatiel,
Selatiel hua Serubabel,
Serubabel hua Abihut,
Abihut hua Elyakim,
Elyakim hua Asor,
Asor hua Sadok,
Sadok hua Akim,
Akim hua Eliut,
Eliut hua Eliasar,
Eliasar hua Matan,
Matan hua Yakob,
hidim Yakob hua Yusuf.
Yusuf saap nol Maria. Maria man hua Yesus Kristus.
17 Tiata kilan deng Abraham lako pes Daud tam, bataꞌ hngul aat; hidim kilan deng Daud lako pes oen tom in soleng lakos se Babilon na, bataꞌ hngul aat; nol kilan deng Babilon lako pes in hua Kristus sa lam, bataꞌ hngul aat kon.
Maria in hua Lamtua Yesus sa
(Lukas 2:1-7)
18 Dehet deng Maria in hua Yesus sa elia:
Dedeng na, Maria nol Yusuf neleng apa son. Oen duas niin nakbuan nol apa banansila el atuil in saap son na lo bii, mo nahkitu lam Maria behe son nini Ama Lamtua Allah Koo Niu ka.✡ Lukas 1:27 19 Nikit Yusuf taan haup noan Maria behe son kon, un le tao nutus oen duas in kom apa ka. Mo Yusuf na mo dalen na niu, tiata un dai tao nahmaeng Maria se atuil hut mamo sila lo. Molam un le tao nutus oen duas in kom apa na ete-ete.
20 Duman mesan na, Yusuf nini le nangan lako-pait kon, un natloa. Se in natloa na dalen, un ngat net Ama Lamtua Allah ima-ii deng sorga maa tek un elia, “Hoe Yusuf! Ku niam laih Daud in hua-koet. Ku lii-tiud in saap nol Maria deken. Ta aan in ne un tain na dalen na ka, Ama Lamtua Koo Niu ka in tao. 21 Mam Maria hua tana-ana biklobe mesa. Hidim ku musti ngali Un ngala ka, Yesus, ta mam Un man bel boa-blingin Ama Lamtua Allah atulin nas deng oen in kula-sala ngas.”‡ Ngaal Yesus sa nahin na noan, “Lamtua bel boa-blingin atuli li deng oen in kula-sala ngas”. ✡ Lukas 1:31
22 Dais ni mam daid ela, undeng Ama Lamtua Allah tek meman son deng lolo hmunan nua. Un pake mee-baah Yesaya la, le dul noan,
23 “Mi hii ke! Mam muik tana-bihatang mesa, haat-ana nabale,
taan lo molota, un behe son.
Kon un hua Tana-ana biklobeng mesa.
Oen ngali Un ngala ka, Imanuel.”
(Se dais Ibranin nam, ‘Imanuel’ nahin na noan:
Ama Lamtua Allah leo-leo nol kita.)✡ Yesaya 7:14
24 Yusuf natloa hidi ela kon, un nahkitu. Hidim un daek muid Ama Lamtua Allah in teka ka. Un sium Maria le daid un sapa, 25 mo un niin nakbua nolan banansila el atuil in saap son na lo, didiin Maria hua hidi Tana-ana ka. Maria hua hidi Tana-ana na kon, Yusuf ngali ngala, Yesus.✡ Lukas 2:21
*1:6-11 In dula dais Yunanin man banan dui ka, dul noan, Asaf. Muik in dula teng pait man dul noan, Asa. Atuling ni banansila el atuil in puit se Dehet deng bangsa Israel nol bangsa Yahuda lalis mesa la peke 3 bango 10.
†1:6-11 In dula dais Yunanin tenga las dulAmos, tenga las pait dulAmon.
✡1:6-11 Lahi-lahi las Buk nomer dua la 24:14-15; Dehet deng Bangsa Israel nol Bangsa Yahuda lalis dua la 36:10; Yermia 27:20
‡1:21 Ngaal Yesus sa nahin na noan, “Lamtua bel boa-blingin atuli li deng oen in kula-sala ngas”.
✡1:23 Yesaya 7:14