Markus
Horok Lirna La'an
Ri Kristen man minle nonolu enihe ra'aheni ri ma naran Markus man hi'i horok eniyeni. Markus eni lernohi Petrus lere Petrus laliwewer loikaru Makromod Lalap Lirna Wawa'an. Markus horok inhawa lira an derne nano Petrus.
Lolo horok eni, Markus konohi Yesus Nin hini'i wenewhe noro Nin wanakuku man Ai nala Nin man lernohi pakunohi enihe. Yesus loikaru Lirna Wawa'an ma nahenia lere Makromod Lalap nodi molollo ri morimori noho wawan maiyedi me'e (1:14-15). Yesus nodi molollo hi'i wa'an ri ma nakni'ir la rohiyedi hayakyak man huhu'urle ri raram.
Yahudi rir man panulu ra'okuledi Ai la lawuku panaeku leke resne (3:6). Ai nauroin rir panaeku, de kukunohi nahenia ka nalo'ol hir resne Ai (8:31, 9:31, 10:33-34). Kade Ai nauroin rir panaeku onne, maa An laa Yerusalem mamani, ono Nin panaeku nala kemen hi resne leke huri we'er ri morimori nano rir dohohala nin hunukum makmaki (10:45). Hi resne Ai, maa An mori wali'ur.
Markus hi'i horok eni leke ik kauroin namlolo kokkoo nahenia Yesus eni Makromod Lalap Ananne, la Makromod Lalap kikan Ai namwali Rai laa ewi-ewi (1:1, 11, 24; 3:11; 5:7; 8:29; 9:7; 14:61-62; 15:39). Markus nin panaeku na'alap ik akin leke ik kamkene lernohi Yesus mamani (8:34-38; 10:29-31).
Horok Ihin
1. Yesus hi'i Nin honowok man dedesne (1:1-13).
2. Yesus wakuku la kukul Nin ke'eke'el an'anha lolo noho Galilea hehen nanumene Yahudi rir man panulu paeku resne Ai (1:14-3:6).
3. Yesus wakuku la ilitolle ri mamani lolo noho Galilea (3:7-6:13).
4. Yesus wakuku ri la kukul Nin ke'eke'el an'anha lolo kota-kota man aile noho Galilea (6:14-8:30).
5. Yesus nala'a nano Galilea laa kota Yerusalem leke nala kemen maki (8:31-10:52).
6. Yesus wakuku la ilitolle ri lolo kota Yerusalem (pnk. 11-13).
7. Hir kele Yesus la wairesne (pnk. 14-15).
8. Yesus mori wali'ur (pnk. 16).
1
Yohanis man ulutade ri lolo oir wauwau Yordan
(Mat. 3:1-12; Luk. 3:1-18; Yoh. 1:19-28)
Horok eniyeni Lira Wawa'an ma na'ono Yesus Kristus, Makromod Lalap Anan. Hari Lira Wawa'an eniyeni namnenehe nabi Yesaya nin horok ma na'ahenia,
“Makromod Lalap na'aheni, ‘Ya'u hopon Ainu'u ma nodi lira na'ahari kalla nolu mai leke hari kalla ki O. * Mal. 3:1
Ri ida aile lolo noho mamun ma napro'uk wakaukau na'ahenia:
Ma'ahari kalla la ma'anehe, leke Makromod lole.’ ” * Yes. 40:3
Enpenia Yohanis ma nodi oir ulutada ri min lolo noho mamun ma napro'uk. Lolo onne an loikaru lir ri na'akeme na'ahenia, “Herredi minim morimori ma ka namlolo eni, mai derne makani Makromod Lalap, la mala mi kemmu ulutade leke namwali tanada nahenia Makromod Lalap na'ohu nahaledi minim dohohala me'e.” Ende ri nammori rano Yudea ulla ki'il lolo waliwali noro kota Yerusalem ne'en raram na'akeme maiwuku, derne Yohanis. Hi meririi werre akin kukunohi rira dohohale nanumene Yohanis norhe laa oir wauwau Yordan raram ulutade.
Yohanis nair nainair rodi unte wulu hi'ie noro kali ehe rodi ha mormori ulikne hi'ie, la nina nana'an nonomun poreke noro wani oir. Yohanis konohiyedi ri na'ahenia, “Yo oluwedi Ri ma nodi molollo narehi ya'u mai. Ainina pakpak ei nin kali me'ene kan wa'an ya'u we'er. Yo odi oir ulutada mi, maa An ulutada mi nodi Roh Kudus.”
Yohanis nodi oir ulutada Yesus
(Mat. 3:13-17; Luk. 3:21-22)
Lere onneni Yesus mai oir wauwau Yordan nano Nin leke Nazaret lolo noho Galilea, de Yohanis ulutada Ai lolo oir onne. 10 Yesus namharedi oir eni ne, An po'on laa wawan, a'am nahinariyedi, la Roh Kudus molmolo merpati ida kopur mai Ai wawan. 11 Onne horu, derne lira ida namhara a'am raram na'ahenia, “Ya An'u O! Ya amre'e amharu O. Om hi'i Ya akin nahuwa'an rehi!”
Hayakyak Makromon ken patal Yesus
(Mat. 4:1-11; Luk. 4:1-13)
12 Lere onne me'ede, Roh Kudus norkaru Yesus laa noho mamun ma napro'uk. 13 An min lolo onne alam weli'akka la Hayakyak Makromon mai kene patal Ai. Lolo onne ha mormori merwui naworo nawa'aha noro Ai, la hophopon a'am raram mai wayahu wadane.
Yesus rakan noho Galilea napolu Nina man lernohi pakunohi dedesne
(Mat. 4:12-22; Luk. 4:14-15, 5:1-11)
14 Kele Yohanis rala laedi bui raram ne, Yesus laa noho Galilea loikaru Makromod Lalap Lirna Wawa'an eni. 15 Ai na'aheni, “Lere Makromod Lalap nodi molollo ri mormori na'uraniyedi me'e. Herredi minim morimori ma ka namlolo eni, la derne makani Makromod Lalap Lirna Wawa'an eni.”
16 Ai nala'ala'a lolo oir lap Galilea arkanne, An do'on ma nohu meki woro'o, Simon noro mo'oniwalla Andreas mahar sopol diyale. 17 Yesus naka'uk hi na'ahenia, “Mam lernohi Ya'u leke Ya'u wakuku mi manoin ri mormori naise manoin i'in.” 18 Idewe hir hoikaruwedi rir diyaleni, laa lernohi Ai me'e.
19 Hi rala'a laa kalari tarana, Yesus do'on Yakobus noro mo'oniwalla Yohanis noro aman Zebedeus mahar tapil dari aile korkore wawan.
20 Ai napoluwedi hi, idewe hir hoikaruwedi aman noro nina man howok enihe, laa lernohi Ai me'e.
Yesus nohi hayakyaka man huhu'urle ri ida raram
(Luk. 4:31-37)
21 Yesus noro Nina man lernohi pakunohi rakan kota Kapernaum nediyale Yahudi nina Alam Renren Warwarna, de Yesus laa Yahudi nina kerei raram wakuku. 22 An wakuku ne, heri mehe nanana mouwedi la aki'aki uluwakun derne Nina wanakukue, ono Ai kan wakuku naise hirira meser Horok Lap enihe, maa An wakuku naise ma nodi molollo.
23 Ai mahan wakuku, ri ida mai kerei raram, hayakyaka hu'uhu'ur raramne. Maiyedi kerei raram ne, an wakau Yesus na'ahenia, 24 “Oih! Yesus! Nazaret O. Onuma inhawa panaeku noro mayai? O mam mesne mayai? Ya auroinedi O me'e. O penia Makromod Lalap Nin Hophopon mememen man moumou dewdewe.”
25 Yesus dadiyale, “Karkaramedi! Mamharedi ai raram here!” 26 Hayakyaka onne do'odewe ri onne me'ede, kais makin la namhara.
27 Idewe na'akeme polletilu. Ida ma na'ukani ida na'ahenia, “Eih! Ha eni inhawpe? Ma namwali eni lo'o wanakuku worworu. Ai nodi molollo hayakyaka enihe penia hir derne rakani Aie!” 28 Enime'ede lira ma na'ono Yesus Nin hini'i eni pelek raderre radaul lolo Galilea ne'en raram na'akeme.
Yesus hi'i wa'an ri nammori
(Mat. 8:14-17; Luk. 4:38-41)
29 Kerei namharedi ne, Yesus, Yakobus noro Yohanis ra'alono laa Simon noro Andreas rira nakar. 30 Lere onne Simon paninne maeke nakni'ir rinna manha, de namkukuru lolo nakar. Hir rakan nakar, manin nakar konohi Yesus na'ahenia, “Pape, mama ornakar nakni'ir rinna manha.” 31 Enine An laa roulle liman namake. Ideweni ne, nin kini'ir wa'anedi. Horu ne, ai na'akene hanana'an hi ra'an.
32 Lere helemedi ri nodi ma nakni'ir noro man hayakyaka huhu'ur raram na'akeme mai Yesus me'e. 33 Ri nammori man holi kota onneni mai nakar onne. 34 Enime'ede An hi'i wa'an apinha rahu eni, la nohi hayakyaka man hu'uhu'ur ri raram enihe. Enimaa, Yesus ka nala leken hayakyaka wakunu, ono hi rauroinedi me'e Ai onne Makromod Lalap Anan.
Yesus wakuku leke-leke namehin lolo Galilea
(Luk. 4:42-44)
35 Rakan noho roropo Ai namaka laa paharne. Ai namhara leke laa onno ma namlina namkai hi'i lir napanak, 36 maa Simon noro nina mukue laa ranoin Yesus. 37 Pakromedi ne, hi ra'aheni, “Eih! Pape, ri nammori maha ranoin Papa!”
38 Enine Ai na'aheni, “Mai kala'a leke-leke ma na'uranrani eni leke Ya'u loikaru Lira Wawa'an lolo enne haenhi. Onne penia Ainu'u panaeku mai noho wawan eni.”
39 Enime'ede An laliwewer Galilea raramne laa Yahudi rira kerei-kerei loikaru Lira Wawa'an onne, la nohi hayakyaka man aile ri raramne.
Yesus hi'i wa'an ri man ulik yaka hi'ie
(Mat. 8:1-4; Luk. 5:12-16)
40 Ler ida mo'oni ida man ulik yak hi'ie mai Yesus kadi ein korno kalarna na'aheni, “Papa ne'e harome hi'i wa'anedi ainu'u apinha ke'e.” 41 Enime'ede Yesus naramyakale, de kemenala liman laa ri onneni na'aheni, “Ye e'e! Wa'anedi here!” 42 Me'e'eni me'ede nina ulik yake moluwedi, de wa'anedi.
43 Horue ne, Yesus hopon ai na'ahenia, 44 “Yom konohi ri ha ma namwali o kemmu eniyeni, maa mala'a laa imam nanu leke an po'onala o kemmu, nauroin nahenia om wa'anedi me'e, la modi onum honoi kanani* Po'onala Im. 14:2-32. Honoi kanani onne namwali manu woro'o naisa orpopo'o. mala ai leke lernohi agame nina holoor halauk eni. Hi'i onne leke namwali tanada nahenia om wa'anedi kokkoo me'e.”
45 Enimaa, ri onne nala'a ka nodi nou onneni, ono an wakunu laliwewer panaeku ma namwali kemen eni. Enpenia ka namwali Yesus laa leke-leke nin leke raram, de minle leke paharne lolo onno ma namlina namkai. Min lolo onne maa, ri nammori lolo waliwali mai leke dernale.

*1:2 Mal. 3:1

*1:3 Yes. 40:3

*1:44 Po'onala Im. 14:2-32. Honoi kanani onne namwali manu woro'o naisa orpopo'o.