Titus
Horok Lirna La'an
Titus ka namwali ri Yahudi, maa ai akin naili'iledi Yesus nalo'ol me'e. Ai onne, Paulus nin kalla wali la nin man howok wali haenhi (2Kor. 8:23; Gal. 2:1-3). Paulus aku horok eni laa Titus lere Titus minle noho Kreta.
Lolo horok eni Paulus nin panaeku ma na'ono hopon Titus leluwai makrana ri Kristen man minle noho Kreta (1:5). Ai na'ori honorok Titus hini'i wenewhe man wa'an ri ma namwali kerei liman ein hi'iye (1:6-9).
An wakuku ai kalla man wa'an leke wakuku ri na'akeme man lernohi Yesus, mo'oni maeke ma na'ileher noro ma ka na'ileher. Ai nala ai wanakuku man paku ri ma namwali hophopon wahwahan leke hir mori wawa'an roro makromonhe (2:9-10). Hophopon onne nonolu eni rin weli leke hopon wahan. Enla an konohi ma namwali Kristen honoli wenewhe man wa'an (3:1-11).
Horok Ihin
1. Paulus nala wanakunu man hari horok (1:1-4).
2. Paulus nala nounaku Titus (1:5-3:11).
3. Paulus nounaku kerei liman ein honoli man wa'an (1:5-9), la nou hi leke ramkene ra'okul ri man loikaru wanakuku ma ka namlolo (1:10-16).
4. Paulus wakuku ri ma namwali Kristen leke rir hini'i wenewhe lernohi wanakuku ma namloleni (2:1-15).
5. Paulus na'ori honorok kerei raramne leke derne rakani rir man panulu la hi'i ha man wa'an (3:1-8).
6. Paulus nala nounaku yon minwuku noro ri man wakuku panaeku ma naiye'er kerei raramne (3:9-11).
7. Paulus nala nou man horu noro tape masi (3:12-15).
1
Hari horok
1 Horok eni nano ya'u, Paulus, ma namwali Makromod Lalap Nina hophopon wahwahan noro idewe hophopon ma nodi Yesus Kristus Lirna Wawa'an eni. An hopon ya'u ilitolle Makromod Lalap Nina ri ninili enihe, leke hi akin namkene naili'il Yesus, la hi rauroin Makromod Lalap Nin wanakuku ma namlolo leke lernohi Nin honorok panaeku wawa'an. 2 Panaeku ma na'ono lolo wanakuku onne hi'i heheni: Or'ori dardari man ik lernala onne namwali iknik ya'ar, la kan horu laa ewi-ewi. Makromod Lalap nouwedi or'ori dardari onne maika lere noho ka namwali makun, la Ai onne hi'i Nin nou namwali ono ka nauroin napoho memen. 3 Enla rakan nelu lere, Makromod Lalap nalhari Nin nou onne lolo Yesus Lirna Wawa'an eni. Lirna onne, Makromod Lalap ma nala or'ori dardari eni, naledi ya'u la hopon ya aderre adaulle.
4 Ya aku horok eni ki o, Titus, ma namwali ya an'u mememen, ono ik akin naili'il Yesus wewerre. Ya apanak na'amoli ik Amad Makromod Lalap noro Makromod Yesus Kristus ma nala or'ori dardari maika, rala rere'e haharu noro wawa'an rara'e ki o.
Titus nin honowok lolo noho Kreta
5 Ya'u hoikaruwedi o minedi lolo noho Kreta, leke tolle honowok ma kan horu makun, la kikan kerei nin man leluwai makrana lolo leke-leke na'akeme. Horhorok ainu'u nounaku eniye: 6 Lere mim nili man leluwai makrana lolo kerei enihe, nili ri ma na'alehe yaksalida, hono ida mehe, ai ananhe akin naili'il Makromod Yesus, la ri mahaku kan kuku sala ananhe nahenia hi ailanna, ee kar derne rakani ri. 7 Nili ri ma na'alehe tunum desne ono ai penia man ilitolle Makromod Lalap Nina honowok. Yono an holi kukulu lalapa, pelek na'ahan, nomun arak manha mamani, raram nodi wahi'i, la yon maki kupan. 8 Nili ri man akin namrana kokala peina'a, suk panaeku man wa'an na'akeme, ai akin namdudu la mou, ai akin ka nahinuri Makromod Lalap, la nauroin nadiyaka kemen. 9 Wa'an rehi ai nasala kerkerhe wanakuku ma namlolo man an kokaledi me'e, leke nauroin nodi nounaku ri, la nauroin nodi kalla man wa'an na'alap ri akin, la kukul ri ma na'okul iknik wanakuku eni rir sala.
10 Ya'u wakunu heheni, ono ri nammori ra'okul iknik wanakuku ma namlolo eni, la hir paipudi ri namehin rodi rira wanakunu ma kan min haida, rehirehi ri Yahudi man nounaku man lernohi Yesus na'ahenia, “Lam sunat nanu!” 11 Kawala hi ma'aheni, “Yon wakuku ri me'e,” ono rir wanakuku man sala onne wali wokoredi nakar raram namansa me'e. Enla hir wakukuwala ri leke lernala naiwe'el mehe. 12 Nonolu eni rira nabi ida manin noho Kreta me'ene na'aheni, “Manina Kreta onnenihe, na'akeme rapoho mamani. Hi raisa ha mormori man ailanna, la hi ramwali ma nasumur la raprehen rehi.” 13 Wanakunu onne memen namlolo! Onne peni ya'u nou o dadiyala hi kokkoo leke hi akin namkene naili'il wanakuku ma namlolo. 14 Dadiyala hi yon derne rakani Yahudi nin koirwakar la ri nin wanakuku ma na'okul wanakuku ma namlolo eni. 15 Ri man honorok akin mou, haida kan luli ono ha man an hewek nair na'akeme moumou dewdewe. Maa ri man honorok akin morso la akin ka naili'il Yesus, moumou dewdewida kaale hi, ono hirira honorok akinne morso de hi ka rauroin ewi ma namlolo noro ewi ma ka namlolo me'e. 16 Hi ra'aheni rauroin Makromod Lalap, maa rapoho ono rira hini'i wenewhe kar lernohi Nin wanakuku. Hi ramhene derne rakani Ai, rir morimori namehiyala wake'e, la kar paekunala hi'i ha man wa'an ida.