Yohanis susula kaesan
Yohanis susula kaesan
1
Yohanis sulak laꞌeneu Yesus Karistus
Au sulak susulak ia laꞌeneu Manetualain Dedeꞌa-kokolan fo Maneni Sodak.
Dedeꞌa-kokolak fo Maneni Sodak ia, mana memak so, neme daebafok makasososan mai. Hatematak ia, au ma au nonoo nggala mita Ndia so minik ai mata deꞌe heheli nala. Ai mamanene Ndia no ai ndiꞌidoo heheli nala so. Ma ai mafaloe laꞌe Ndia, minik ai lima heheli nala so. Ai mita Ndia leondiak, Yohanis 1:1 huu Ana sadu mai, neu ai lalada nala. Makahulun, Ana leo no Ndia Aman, tehuu hatematak ia, Ana natudu Ao-inan neu ai so. Huu ndia, de, ai mambalani mafada ei, dalan talobee, fo hataholi bisa nasoda no ndoos nakandondoo henin. Huu Ndia ia, Dedeꞌa-kokolak fo Maneni Sodak. Yohanis 1:14 Ai mahiik mafada ei, basa hata fo ai mitan so, ma basa hata fo ai mamanenen so, suek ei bisa dalek esa mia ai. Huu ita basa nggata nanambaꞌak to Manetualain so, ma Ndia Anan, fo Ana haituan mai, na ndia Yesus Karistus. De, ai sulak susulak ia, suek tao namahoko ei dale mala. No leondiak, na, ai dale nala boe oo lamahoko tebe-tebe.
Hataholi kamahele kala musi lasoda lai manggaledok dale
Nanonolik fo Yesus nafada ai ndia, na hatematak ia, ai sangga mafada ei, leoiak: Manetualain ndia, neulau hiak. Taa hambu Ndia manggalaun fa boe, Ndia sama leo manggaledok mana masaꞌak, fo makiun taa fa boe. Mete ma ita kokolak tae, “Ita tasoda dalek esa to Lamatuak,” naa te ita bei tasoda tao dedeꞌa manggalauk, na, ndia sama leo ita tasoda nai makiuk dale. Huu, ita kokolak tasapepeko, ma taa bisa tasoda tungga dala ndoos. Tehuu mete ma ita tasoda nai dala ndoos, na, ita sama leo hataholi mana masoda nai Manetualain manggaledon dale. No leondiak, na, ita bisa tasoda dalek esa to hataholi feꞌek. Ma ita dale nala dadik malalaok, huu Manetualain Anan Yesus maten, ma daan koka heni basa ita sala nala.
Hataholi mana masoda nai manggaledok dale, na, nasoda taa tao salak so bali
Mete ma ita kokolak, tae, “Ita taa tao salak,” na, ndia dadik tanda nae, ita pepeko seluk ita ao-ina heheli nala, ma taa bubuluk hata fo tetebes. Tehuu mete ma ita manaku ita sala nala, na, neu ko Manetualain mana maena dale ndoos boe oo, koka heni ita sala nala, ma, tao nalalao ita dale nala tungga Ndia hehelun. 10 Mete ma ita kokolak tae, “Ita taa tao salak titak,” na, ita tao Manetualain dadik masapepekok! Huu Ana kokolak so nae, basa hataholi la tao salak. De, mete ma ita kokolak leondiak, na, manggaledok so, nae, Ndia Dedeꞌa-kokolan taa nai ita dale nala.

1:1 Yohanis 1:1

1:2 Yohanis 1:14