Lamatuak Yesus Tutui Malolen
tungga
Mateos
1
Lamatuak Yesus susula bei-baꞌi nala
(Lukas 3:23-38)
1-2 Susulak ia, tui laꞌeneu Yesus Karistus, fo Hataholi ndia, Manetualain helu mema kana, neme makahulun mai so, fo sangga haituan mai. Ndia ndia, baꞌi Abraham ma mane Dauk numbu-sadun.
Mulai neme baꞌi Abraham losa mane Dauk, hambu dope sanahulu haa. Susula nadek bei-baꞌi nala, leoiak:
Abraham bonggi Isak,
Isak bonggi Yakob,
Yakob bonggi Yahuda no ndia kaꞌa fadi nala,
3 Yahuda bonggi Peres no Sera (sila inan, nade Tamar),
Peres bonggi Herson,
Herson bonggi Ram,
4 Ram bonggi Aminadab,
Aminadab bonggi Nahason,
Nahason bonggi Salmon,
5 Salmon bonggi Boꞌas (inan nade Rahab),
Boꞌas bonggi Obet (inan nade Rut)
Obet bonggi Isai,
6 Isai bonggi Dauk.
7-11 Neme Dauk mai, losa faik ndia, hataholi nusa Israel nana fua henik leni Babel leu, hambu dope sanahulu haa bali, fo ndia:
Dauk bonggi Soleman (inan ndia makahulun Uria saon).
Soleman bonggi Rehabeam,
Rehabeam bonggi Abia,
Asaf bonggi Yosafat,
Yosafat bonggi Yoram,
Yoram bonggi Usia,
Usia bonggi Yotam,
Yotam bonggi Ahas,
Ahas bonggi Heskia,
Heskia bonggi Manase,
Manase bonggi Amos,† Susula dedeꞌa Yunani luma ala sulak Amos, ma luma bali na ala sulak Amon.
Amos bonggi Yosias,
Yosias bonggi Yekonya, ma ndia fadi nala, fo neu faik ala fua sala leni Babel leu.✡ 2 Mane-mane kala 24:14-15; 2 Israꞌel no Yahuda Tutuin 36:10; Yermia 27:20
12-16 Faik, fo sila nanafuak leni Babel leu losa Yesus, hambu dope sanahulu haa bali, ndia:
Yekonya bonggi Saltiel,
Saltiel bonggi Serubabel,
Serubabel bonggi Abihut,
Abihut bonggi Elyakim,
Elyakim bonggi Asor,
Asor bonggi Sadok,
Sadok bonggi Akim,
Akim bonggi Eliut,
Eliut bonggi Eliasar,
Eliasar bonggi Matan,
Matan bonggi Yakob,
Yakob bonggi Yusuf.
Yusuf ndia, sao nala Maria. Boe ma Maria ndia bonggi nala Yesus Karistus.
17 De, mulai neme Abraham mai, losa Dauk, hambu dope sanahulu haa; neme Dauk mai, losa ala fua sala leni Babel leu, hambu dope sanahulu haa; ma neme Babel mai, losa bonggi Karistus, hambu dope sanahulu haa.
Maria bonggi Lamatuak Yesus
(Lukas 2:1-7)
18 Maria bonggi Yesus ndia, na tutuin leoiak:
Maria nafufudik no Yusuf so. Dua sala bei ta sunggu lakabubua, leo masao kala, naa te, Maria nailu neme Manetualain Dula Dale Malalaon mai so.✡ Lukas 1:27 19 Ledoeik Yusuf bubuluk leondiak, boe ma ana sangga tao naketu sila dua sala natututin. Tehuu taa nau tao nakamamaek Maria nai hataholi noꞌuk mata nala, huu ndia dalen malalaok. Huu ndia de ana sangga tao naketun kada no neneek.
20 Boe ma, ledoeik ana bei duduꞌa neu-mai, leꞌodaek esa ana nalameꞌi. Nai meꞌis ndia dalek, nita Manetualain atan neme nusa-sodak mai nafadan, nae, “Wei Yusuf! O ia, mane Dauk numbu-sadun. O boso makandaa sao mala Maria. Huu, kakanak manai ndia tein dalek ndia, Lamatuak Dulan tataon ndia. 21 Dei fo, Maria bonggi kakana touanak esa. Basa na, o musi foin nade Yesus, huu neu ko, Ndia tao nasoda Manetualain hataholin nala leme sila salan nala mai.”‡ Nade Yesus ndandaan nae, “Lamatuak tao nasoda hataholi.” ✡ Lukas 1:31
22 Dedeꞌak ia neu ko dadi leondiak, huu Manetualain nafada mema kana neme makahulun mai so. Ana pake nitak Ndia mana kokolan Yesaya fo sulak nae,
23 “Ei mamanene baa! Dei fo inanak esa bei aotema,
naa te nailu.
Basa de, ana bonggi kakana touanak esa.
Ala foin nade Imanuel.”
(Nai dedeꞌa Ibrani, ‘Imanuel’ ndandaan nae:
Manetualain no ita basa nggata.)✡ Yesaya 7:14
24 Yusuf nalameꞌi basa, boe ma ana foꞌa. De, ana tao tungga tutik Manetualain hehelun ndia. Ana haꞌi nala Maria dadik neu ndia saon, 25 tehuu, taa sunggu nakabubua non leo masaok ia, losa Maria bonggi heni Kakanak ndia. Bonggi basa boe ma, Yusuf foi Kakanak ndia nade Yesus.✡ Lukas 2:21
*1:7-11 Susula dedeꞌa Yunani neulaun ana seli, nana sulak Asaf. Hambu susulak luma bali sulak lae, Asa. Hataholi ia, sama leo hataholi manai Tutuik Israel ma Yahuda Kaesan tatada katelun, lalane kasanahulun.
†1:7-11 Susula dedeꞌa Yunani luma ala sulak Amos, ma luma bali na ala sulak Amon.
✡1:7-11 2 Mane-mane kala 24:14-15; 2 Israꞌel no Yahuda Tutuin 36:10; Yermia 27:20
‡1:21 Nade Yesus ndandaan nae, “Lamatuak tao nasoda hataholi.”
✡1:23 Yesaya 7:14