1 Yohanis
Sasuri Yohanis ka èci
1
Yohanis suri lula-nèti Yesus Kristus
Jaꞌa suri sasuri ne, lula-nèti Lii Holo-Nori dhu Hia Mamuri.
Lii Holo-Nori dhu Hia Mamuri ne, abhu mema le karèi nèti rai-haha jꞌajꞌi. Neꞌe ne, jaꞌa dènge angalai jaꞌa ladhe ngèdhi le Nèngu dènge musi madha jiꞌi. Jiꞌi tadèngi le lii Na dènge roꞌa dhilu jiꞌi. Aa jiꞌi gꞌagꞌe ngèdhi le Nèngu dènge kacui-aai jiꞌi unu mi. Jiꞌi ladhe ngèdhi Ne sèmi èèna ka, Yohanis 1:1 lula Na cèu mai ètu talora aae jiꞌi. Uru èèna, Nèngu pea dènge Ama Na, te ngaa limuri ne Na padꞌelo le ngiꞌu aae Nèngu mi jiꞌi. Nèti èèna ka, jiꞌi bani lole dènge miu tasa mera mia dhèu rai-haha bisa abhu mamuri mola dhu dènge boe too-lane. Te Nèngu ne Lii Holo-Nori dhu Hia Mamuri. Yohanis 1:14 Jiꞌi neo peka dènge miu, aaꞌi-aaꞌi dhu jiꞌi ngèdhi le aa aaꞌi-aaꞌi dhu jiꞌi tadèngi le, sèna ka miu dènge jiꞌi sama-sama bisa mamuri dꞌara èci. Te èdhi aaꞌi-aaꞌi ti dhu paꞌèki le dènge Ama Lamatua, aa dènge Ana Na dhu Nèngu pua mai, nuka Yesus Kristus. De jiꞌi suri sasuri ne, sèna ka pamahoꞌo dꞌara miu. Dènge jꞌara neꞌe, dꞌara jiꞌi asa tabha karejꞌe kahèi.
Dhèu parcaya hudꞌi mamuri ku ètu dꞌara saraa
Aꞌajꞌa dhu Yesus lole dènge jiꞌi, èèna ka dhu limuri ne jiꞌi neo peka dènge miu. Sèmi neꞌe: Ama Lamatua beꞌa seli eele. Bhabhelu-katubꞌa ciki sa abhu boe ètu Nèngu. Te Nèngu ne nuka sèmi saraa dhu heo loꞌa-loꞌa, dhu pabꞌali boe dènge maroga ciki sa. Ladhe èdhi padhai lii, peka na, “Èdhi mamuri dꞌara èci dènge Lamatua,” aa te ngaa èdhi mamuri tao bhelu era, na, èèna sama sèmi èdhi mamuri ètu dꞌara maroga. Te èdhi padhai lii kapodꞌe-kabèli aa mamuri madhutu boe jꞌara dhu mola. Te ngaa ladhe èdhi mamuri madhutu jꞌara mola, èdhi èci èèna ka dènge dhèu dhu mamuri ètu dꞌara saraa Ama Lamatua. Dènge jꞌara ne, èdhi aaꞌi-aaꞌi ti bisa mamuri dꞌara èci. Aa dꞌara èdhi mola-mèci, lula mamadhe Yesus Kristus, Ana Ama Lamatua, aa raa Nèngu rase pamèu-mèu sasala èdhi.
Dhèu dhu mamuri ètu dꞌara saraa, mamuri heka dènge tao sala
Ladhe èdhi padhai lii, peka na, “Èdhi tao boe sala,” èèna jꞌajꞌi tadha, peka na, èdhi tipu ngiꞌu èdhi unu ti, aa teꞌa boe mia ka dhu lèke. Te ngaa ladhe èdhi mangaku sasala èdhi, tatu Ama Lamatua dhu dꞌara mola, saku eele sasala èdhi madhutu lii pajaji Na, aa Na pamèu dꞌara èdhi. 10 Ladhe èdhi peka, na, “Èdhi tao tèdhi boe sasala,” sasoa na, èdhi tao Ama Lamatua dhèu leko-monya! Te Nèngu ka dhu peka tèke, na, dhèu aaꞌi-aaꞌi dhu manahu asa dꞌara sasala-sasigo. Aa ladhe lii padhai èdhi sèmi èèna, tadha na, Lii Holo-Nori Nèngu abhu boe ètu dꞌara èdhi.

1:1 Yohanis 1:1

1:2 Yohanis 1:14