Sasuri nèti
Yudas
1
Lii mahoꞌo
Lii mahoꞌo nèti jaꞌa, Yudas, ari Yakobis. Jaꞌa ne, ana pua-paleha nèti Kètu èdhi, Yesus Kristus.
Jaꞌa suri sasuri ne hia dhèu aaꞌi-aaꞌi dhu Ama Lamatua hagꞌe nare, dhu Na sue, aa dhu Yesus Kristus loe boe jꞌaga si toke dꞌai Nèngu mai hari. Mateos 13:55, Markus 6:3 Jaꞌa manèngi ho Ama Lamatua padꞌelo rasa kasia aa padꞌelo dꞌara hua iia Na ae-ae mi miu, sèna ka miu bisa mamuri padame èci dènge èci.
Yudas pasanèdꞌe dhèu parcaya lula-nèti dhèu dhu ajꞌa sala
Aꞌari dhu pasue! Uru èèna jaꞌa neo suri sasuri hia miu, lula-nèti jꞌara aaꞌi-aaꞌi dhu Ama Lamatua tao, sèna ka hia mamuri mi èdhi. Te ngaa limuri ne, abhu lii langu, de jaꞌa hudꞌi suri hari jꞌara dhu leo. Ama Lamatua pangèdꞌu le mi èdhi jꞌara mamuri dhu mola. Nèngu hia jꞌara mamuri ne ca tèka di, aa Na ubꞌa boe. Nèngu hia jꞌara mamuri ne mi dhèu-dhèu parcaya. De jaꞌa manèngi sèna ka miu paꞌèra-èra dꞌara, ho dhèu baku pakapodꞌe jꞌara mamuri nèti Lamatua.
Te ngaa abhu le pèri-pèri dhèu dhu mai pahuni-pahuni ètu talora aae miu. Dhèu sèra madhutu boe jꞌara mamuri Ama Lamatua dhu mola, te ngaa ra madhutu dadꞌèi dꞌara unu ra. Rèngu peka na, dꞌara hua iia Lamatua ka dhu bhoke jꞌara ho rèngu bisa tao leli. Èèna na omo koso! Rèngu se dhèu dhu peka leo, tao leo! Dadꞌèi rèngu ka, ho èdhi nanene ia ka Dhèu Aae èdhi dènge Kètu èdhi, Yesus Kristus. Te ngaa sanèdꞌe, te dhu suri tèke ètu Sasuri Mola-Mèci, na, Lamatua unu Na ka dhu tao tèke le hahuku dhu jꞌèra karèi nèti uru ka.
Lamatua huku dhèu dhu ajꞌa-nori lèke boe, nuka sèmi uru èèna Na huku ana pajuu nèti sorga dènge dhèu bhelu-katubꞌa
Abhu jꞌara ae dhu miu meꞌa le, te ngaa jaꞌa pasanèdꞌe hari, ho miu baku pamudꞌe.
Sanèdꞌe ku lii lolo uru-uru sèra, lodꞌo dhèu Israꞌel kalua nèti Masir. Masi ka Ama Lamatua hia mamuri le dhèu ca nau kateme, te ngaa dꞌai loo-limuri, Na palaho eele aaꞌi dhu roꞌo boe parcaya Ne. Kalua nèti Masir 12:51, Sensus 14:29-30
Conto leo, nuka ana pajuu Lamatua ètu sorga. Ama Lamatua pangèdꞌu si koasa, te ngaa dènge lane kahèi. Te ngaa rèngu cahagꞌe roca boe, hèia ra tao risi nèti hak rèngu. Hèia Lamatua èki si, pake rate dhu bisa boe maꞌète, aa taha si ètu era maroga sèna ka mate dꞌai Lodꞌo dhu Ama Lamatua neo pamaꞌète sasala dhèu aaꞌi-aaꞌi ra.
Aa mage bhèlu kota Sodom dènge kota Gomora, dènge rae-rae leo dhu padètu ètu sèra. Dhèu-dhèu ra dꞌèi dhoka adꞌu-ue rupa-rupa bhabhelu-katubꞌa dènge dhèu dhu dhèu èmu rèngu boe. Rèngu dꞌèi titu kèna paꞌèci dhu lèke-lèke boe kahèi. Te ngaa Lamatua pakèpu aaꞌi si pake ai. Lii lolo ne pasanèdꞌe èdhi, peka na, bèli-camèdꞌa Lamatua pake ai naraka dhu madhe boe èèna, sèna ka huku aaꞌi-aaꞌi dhu bhelu-katubꞌa. Lii Lolo dhu Uru Tèka 19:1-24
Masi ka sèmi èèna, te ngaa dhèu dhu maso asa talora aae miu sèra, mamuri adꞌu-ue sasala taruu. Aa te ngaa, lii nii ra, ka rèngu pake jꞌajꞌi mi alasan ho pakajꞌalu iisi ra, ho labꞌa leli dhèu dhu rèdꞌu koasa, aa pahahe koasa-koasa dhu hua iia ètu sorga. Te ngaa Mikael tao boe sèmi rèngu. Nèngu èèna, madho nèti ana pajuu Lamatua ètu sorga. Lodꞌo Musa heka madhe èèna, Mikael dhu pabꞌala dènge dhèu aae nidhu lula-nèti ngiꞌu aae Musa. Te ngaa Mikael pasala boe ne, do pahahe boe ne kahèi. Dhoka na peka na, “Pe Lamatua ka ator èu, heka èu sèmi more pala mu kèna!” Daniel 10:13,21, 12:1, Rai-haha Rupa Hiu 12:7, Lole Hari Jꞌara-jꞌara Mamuri 34:6, Sakaria 3:2
10 Te ngaa dhèu dhu maso asa talora aae miu, sama boe sèmi èèna. Dhèu se pahahe aa pusi-pahae boe jꞌara aaꞌi-aaꞌi dhu rèngu reꞌa boe. Rèngu dhoka madhutu dadꞌèi dꞌara di, nuka sèmi badha sa. Nèti èèna ka, rèngu paꞌele iie ngiꞌu unu ra.
11 Mata unu ra! Pe sèmi rare pala ra. Te tatao rèngu nuka sèmi Kaen, dhu hake pamadhe ari dꞌèlu na. Ra tao nuka sèmi Balaam, dhu sabꞌa ngaa èèna ka, sadꞌi abhu doi. Rèngu tao kahèi sama sèmi Kora, dhu unu mamadhe-mamopo lula palabꞌa dènge Lamatua. Lula bhabhelu-katubꞌa ra, èèna na rèngu pakajꞌèu nèti Lamatua kahèi. Lii Lolo dhu Uru Tèka 4:3-8, Sensus 22:1-35, 16:1-35
12 Ladhe rèngu pakaboko dènge miu ho sanèdꞌe sasue Lamatua, lodꞌo miu miꞌa sama-sama, na, rèngu reꞌa boe makae, aa mangaꞌa dèu ngara. De miu baku pamudꞌe. Te rèngu nuka sèmi hadhu aae ètu dꞌara dhasi dhu bisa pamae kapa.* Sasuri lii Yunani ètu neꞌe bisa dua sasoa. Ka èci, Yudas pasoro dhèu bhelu se dènge “hadhu aae”. Do, na pasoro rèngu dènge “noda dhu pakajꞌalu”. Rèngu cakaraa liru mèdhi ètu dedha rai mango dhu papuru boe èjꞌi ca pasuti sa. Rèngu dhoka lii padhai di dhu kapai, te ngaa tao rare boe ngaa èci sa dhu beꞌa. Rèngu èci èèna ka dènge ana aajꞌu dhu guna boe ngaa-ngaa. Ladhe dꞌai hèru hua, hua boe cue sa hèi; teꞌa boe, na, dhu bete eele le toke dꞌai amo-èsu kateme. 13 Sasabꞌa ra dhoka pamakae èdhi di. Te rèngu nuka sèmi naha dhasi dhu tèke eele horo dhu pènu dènge kajꞌalu dhutu-dhutu ètu sebhe dhasi. Rèngu sama sèmi hua-hètu kahèi dhu laꞌe-mai ètu dedha-liru dhu abhu huku, ka Lamatua tèke si ètu era èci dhu maroga aatu-aatu, hèia ele aaꞌi si.
14 Henok, ana-èpu ka pidhu, ige mulai nèti Adam. Nèngu peka mema le, lula-nèti dhèu sèmi seꞌe se. Te na peka na,
“Miu ladhe sèku.
Lamatua èdhi mai dènge ana pajuu Na nèti sorga dhu mola-mèci.
Rèngu sèra, ae titu kèna toke ige tare boe. Lii Lolo dhu Uru Tèka 5:18,21-24
15 Nèngu mai ho pamaꞌète lii langu dhèu aaꞌi-aaꞌi ra.
Èèna na Nèngu padꞌelo sasala nèti ca dhèu-ca dhèu,
dènge bhoke paledꞌa-ledꞌa tatao-tatao rèngu dhu lèke boe.
Na pabèbhe hahuku mi dhèu bhelu-katubꞌa sèra,
lula padhai lii rèngu dhu lèke boe mi Lamatua.”
16 Dhèu seꞌe se reꞌa dhoka loe boe kaꞌugu di. Rèngu muri dhoka pasasei di. Ra pusi-pahae boe dadꞌèi Lamatua, aa madhutu dhoka dadꞌèi dꞌara rèngu di. Rèngu dhoka padhai lii padedha iisi ra. Ra dꞌèi pahie rèhu dènge mangojo dꞌara dhèu, sèna ka hudꞌi laa rèngu abhu pala madhutu dadꞌèi ra.
Padhèdi mamuri miu mi dedha fanderen nèti lalèka miu dhu mola-mèci
17-18 Aꞌari pasue aaꞌi-aaꞌi! Baku bhèlu lii padhadha Kètu èdhi, Yesus Kristus, dhu dhèu pajuu-paleha Na peka-padhai mema mi miu, na, ladhe oe èle rai-haha, dhèu dhu tema pa-aape dhèu, èèna na, cèu mai. Rèngu dꞌèi pahahe dadꞌèi Lamatua, ho madhutu dadꞌèi rèngu unu ra dhu koe-kapengo. 2 Petrus 3:3 19 Limuri ne, abhu le dhèu sèra. Rèngu ka dhu kakèjꞌi dhèu ètu mia-mia, sèna ka pamae-pamanyèla miu. Mamuri ra dhoka madhutu dadꞌèi dhèu rai-haha di, lula Roh Lamatua dhu Mola-Mèci abhu boe ètu dꞌara rèngu.
20 Te ngaa aꞌari pasue! Miu hudꞌi padhèdi ku mamuri miu mi dedha fanderen nèti lalèka miu dhu mola-mèci. Aa ladhe miu sabajꞌa, madhutu ngaa dhu Roh Mola-Mèci peka dènge miu. 21 Sanèdꞌe, Ama Lamatua sue miu titu kèna. De jꞌaga ngiꞌu miu, aa sanèdꞌe sasue Na. Aa miu hudꞌi tatae taruu, sèna ka Kètu èdhi, Yesus Kristus, padꞌelo rasa kasia mi miu, aa hia miu mamuri dènge Ama Lamatua toke dꞌai mia-mia laꞌe.
22 Miu hudꞌi padꞌelo ku rasa kasia mi dhèu dhu dꞌara kajari. 23 Miu hudꞌi bantu dhèu aaꞌi-aaꞌi dhu parluu abhu mamuri, sama sèmi miu ère dhèu nèti dꞌara ai karoo. Abhu dhèu leo hari dhu miu hudꞌi padꞌelo ku dꞌara beꞌa miu dènge rèngu. Te ngaa, mage-mage! Masi ka miu rasa kasia mi rèngu, te ngaa miu kahèi hudꞌi madenge ku dènge kajꞌalu ra, nuka sèmi dhèu madenge dènge kodho dhu kajꞌalu. Sasuri lii Yunani peka na, “Baku gꞌagꞌe mèdha-papake rèngu dhu kajꞌalu sèra.” Lii neꞌe, sasoa na, “Mamuri bhelu rèngu dènge aꞌajꞌa rèngu baku pangaru miu.”
Koa-kio mi Lamatua!
24 Mai ti koa-kio padedha-dedha Ama Lamatua!
Te Nèngu ka dhu bisa madhenga miu,
sèna ka baku manahu.
Aa Nèngu ka dhu bisa lere miu,
sèna ka miu titu ètu madha Lamatua,
te Nèngu ka dhu pamèu miu,
toke hahera abhu boe ciki sa hèi.
Miu mai dènge dꞌara karae,
te dadedha Na kapai titu kèna!
25 Dhodhoka Ama Lamatua mesa-mesa Na,
dhu jꞌajꞌi Lamatua dhu lèke,
dhodhoka Nèngu di dhu bisa pamamuri èdhi!
Hèia Na pake Kètu èdhi, Yesus Kristus,
ho pala-bagi èdhi mamuri.
De lii koa-kadꞌiri hia aaꞌi mi Nèngu.
Dadedha dènge kapai aaꞌi-aaꞌi unu Nèngu.
Koasa Na kapai titu kèna.
Aa hak paredha Nèngu,
karèi nèti uru ka,
deo neꞌe,
toke dꞌai mia-mia laꞌe.
Tareꞌa-reꞌa! Nèngu èèna kèna!
Nèti jaꞌa,
Yudas

1:1 Mateos 13:55, Markus 6:3

1:5 Kalua nèti Masir 12:51, Sensus 14:29-30

1:7 Lii Lolo dhu Uru Tèka 19:1-24

1:9 Daniel 10:13,21, 12:1, Rai-haha Rupa Hiu 12:7, Lole Hari Jꞌara-jꞌara Mamuri 34:6, Sakaria 3:2

1:11 Lii Lolo dhu Uru Tèka 4:3-8, Sensus 22:1-35, 16:1-35

*1:12 Sasuri lii Yunani ètu neꞌe bisa dua sasoa. Ka èci, Yudas pasoro dhèu bhelu se dènge “hadhu aae”. Do, na pasoro rèngu dènge “noda dhu pakajꞌalu”.

1:14 Lii Lolo dhu Uru Tèka 5:18,21-24

1:17-18 2 Petrus 3:3

1:23 Sasuri lii Yunani peka na, “Baku gꞌagꞌe mèdha-papake rèngu dhu kajꞌalu sèra.” Lii neꞌe, sasoa na, “Mamuri bhelu rèngu dènge aꞌajꞌa rèngu baku pangaru miu.”