Susurak numa
Yudas mai
1
Soda-molek
Hara masodak numa au mai, Yudas. Au ia, ita Lamatuan Yesus Karistus hatahori neondan. Au oo Yakobis fadin boe.
Au surak susurak ia fee basa hatahorir fo Manetualain here nala sara ena. Ana sue sara, ma Yesus Karistus nanea sara nakandoo losa Ana fali mai. Mateos 13:55; Markus 6:3 Au oke-hule fo Manetualain natudu Ndia dale kasian, ma fee Ndia susue-lalain noꞌun seli neu ei, mita fo ei leo-laꞌo no mole-damek ma lino-lendek.
Yudas fee nesenedak neu hatahori kamaherek laꞌe-neu hatahori fo mana fee nenorik sala
Toranoo susue nggara ein! Fai bakahulun au hii alan seli surak fee ei, basa-basan laꞌe-neu Manetualain tao nasoi-nasoda ita. Tehuu hatematak ia hambu dedeꞌak sou, huu naa de au ameda no nekesetik, nau ta nau au muste surak laen. Manetualain fee ita eno-dala masoda ndoos ena. Ana fee eno-dala masodak naa laꞌe esak ka, ma Ana ta nggati-nggati sana. Ana fee eno-dala masodak naa neu Ndia hatahori kamaheren nara. Dadi hatematak ia au oke fo ei maote tebe-tebe ma mambariik mahere, mita fo hatahori boso soba-soba nggati eno-dala masodak manuma Manetualain mai naa.
Huu hambu hatahori hida fee nenorik ro neneek rai ei taladam ena. Sira raa, ta tungga Manetualain eno-dala masoda ndoon, tehuu ara tungga-tungga kada sira ao-mbaa hihiin mesa kasa. Ara rae Lamatuak dale susuen ndia soi dalak fo ara bole tao sadi ndaa talo naa. Naa kokola bafa rouk ena! Sira raa, kokolak laen, tao laen! Ara nau fo ita hae tamanene bali neu ita Manen ma ita Lamatuan Yesus Karistus. Tehuu ei masaneda, sama leo neni surak nai Susura Malalaok nae, Manetualain mesa kana henggenee memak sira huku-dokin numa lele uluk mai ena.
Lamatuak hukun hatahori mana fee nenorik sala, sama leo fai bakahulun Ana hukun ata numa nusa tetuk do inggu temak mai ma hatahori manggarauk
Ei bubuluk dedeꞌak noꞌuk ka ena, tehuu au fee nesenedak seluk neu ei fo muste besa-besa.
Masaneda tutuik tembo uluk, neu Israꞌel asa kalua numa Masir mai. Leo mae Lamatuak tao nasoi-nasoda hatahori nusak katemak esa, tehuu fai bakahiton Ana oo nakalulutu basa sara, fo ta mana nau ramahere neun boe. Kalua numa Masir mai 12:51; Susura Rerekek 14:29-30
Haꞌi netuduk laen laꞌe-neu Manetualain atan manai nusa tetuk do inggu temak. Manetualain fee sara koasa, tehuu neni ukuk. Tehuu ketuk rameda naa bei ta dai, boe ma ara ralai seli sira koasan. Tehuu Manetualain futu-paꞌa sara pake rante fo ta bisa rakamboꞌik, ma oka sara reu mamana makiuk, rahani Faik naa fo Manetualain nae naketu-naladi basa hatahorir dedeꞌan.
Ma boso lilii-ndondou kota Sodom no kota Gomora, ma nggorok laen nara mana matia-taik rai naa. Hatahorin nara hii tao manggarauk mata-matak ro hatahori fo ta sira sao toun do sira sao inan. Ara oo hii tao tatao-nonoꞌik bee fo ta no dala-hadak boe, sama leo touk sunggu-soro no touk ma inak sunggu-soro no inak. Tehuu Manetualain nakalulutu basa sara pake aꞌi ena. Tutuik ia, fee nesenedak neu ita, neu ko Manetualain pake aꞌi mbila ta kala matek, fo huku-doki basa manggarauk lalaꞌen. Tutui Makasososak 19:1-24
Leo mae talo naa oo, tehuu hatahori mana maso nai ei taladam naa, ara leo-laꞌo ro peko-pakik rakandoo boe. Ma ara pake sira meꞌi-afen dadi neu netehuuk fo tao ranggenggeo aon nara, ma laban sadi ndaa neu hatahori mana toꞌu koasa, ma rakadadaek koasa maloler rai nusa tetuk do inggu temak. Tehuu Mikael ta tao sama leo sira. Ndia naa, mandor soa-neu Manetualain atan nara marai nusa tetuk do inggu temak. Neu Musa bei fo mate, Mikael nareresi no nitur malangga ina-huun, laꞌe-neu Musa ao-mbaa mamaten. Tehuu Mikael ta fee salak neu sana, do nakadadaek kana. Ana kada nafadan nae, “Neu ko Manetualain ndia koladu o, dei fo mameda mitan!” Daniel 10:13, 21; 12:1; Dae-bafo Beuk 12:7; Tui Seluk laꞌe-neu Dala Masodak 34:6; Sakaria 3:2
10 Tehuu hatahori iar ta leo naak. Ara rakadadaek ma rakatitiik basa hata fo ara ta ralela sara. Ara tao hata a mesan tungga kada sira ao-mbaan hihiin, sama leo banda-manur duduꞌa-aꞌafi taak. Huu naa de ara rakalulutu sira ao heli-helin.
11 Besa-besa! Neu ko ara hambu rala sira babaꞌen. Ara tao tungga sama leo Kaen, fo mana nakanisa ndia fadi bonggin. Ara tao tungga sama leo Balaam, fo nae tao hata a mesan, sadi hambu doik. Ara oo tao tungga sama leo Kora boe. Ana nakalulutu, nahuu ana laban Manetualain. No sira manggaraun naa, de neu ko hatahori iar oo lenggo feꞌe numa Manetualain mai boe. Tutui Makasososak 4:3-8; Susura Rerekek 22:1-35; 16:1-35
12 Mete ma hatahori iar rakabua ro ei fo masaneda Manetualain susue-lalain, neu ei miꞌa-minu sama-sama, na, ara ta rameda mae ro sira bare-naꞌon. De ei muste besa-besa, ee! Sira iar nok bali batu unuk nai tasi dale fo nakalulutu ofak.* Dedeꞌa Yunani nai ia bisa hambu sosoa-ndandaak dua. Esa, Yudas nakasasamak hatahori manggarauk kara sama leo “batu unuk”. Esa bali ana nakasasamak kasa sama leo, “noda mana tao manggenggeok”. Ara oo sama leo sosoꞌa nggeok nai dae madak lain boe, te ta natuda soba udan faa boe na. Ara kada kokolak raloloa bafan, tehuu ta tao hata-hata fo neulauk. Ara nok bali ai huuk fo ta naena sosoak faa boe na. Neu fai neboak, ara ta fee boak esa boe na; naa te neni feꞌa henik losa okan nara ena. 13 Sira ue-osan nara kada rakamamaek ita. Sira iar, sama leo rii moꞌok tufa laꞌo ela hanuk manggenggeok tungga-tungga tasi tatain. Ara oo sama leo nduuk mana lali-lali neu-mai nai lalai boe, mana hambu hukun fo Manetualain tao sara reu mamana makiu-makahatuk esa, de ara ta toda losa doon naa neu.
14 Henok naa, tititi-nonosik kahitun, reken numa Adam mai. Ana nafada memak mandadik hata soa-neu hatahori matak ia. Ana nae,
“Ei mete sudik kana.
Ita Lamatuan mai no Ndia ata malalaon nara numa nusa tetuk do inggu temak mai.
Sira raa noꞌun seli, losa ta bisa reke tala sara bali. Tutui Makasososak 5:18, 21-24
15 Ana mai fo nae naketu-naladi basa hatahorir dedeꞌan.
Neu ko Ana natudu basa hatahori esa-esak salan nara lalaꞌen,
ma buka nakaholak basa hata fo ta ndaak kara.
Ana fee huku-dokik neu hatahori manggarauk kara,
nahuu ara kokolak ta malole soa-neun.”
16 Hatahori dae-bafok iar oo ralela kada unggu-remuk ta basa-basa boe. Ara soa rakasasaꞌek salak neu hatahori taa-taa. Ara ta tao matak neu Manetualain hihii-nanaun, ma tungga kada sira ao-mbaan hihiin mesa kasa. Kokolan nara kada rakadedema aok a mesan. Ara soa sangga matak ma haꞌi hatahori dalen, mita fo hambu nanalak tungga kada sira hihiin.
Mambaririik ei masodam neu ei nemehere malalaom fanderen lain
17-18 Toranoo susue nggara ein! Boso lilii-ndondou ita Lamatuan Yesus Karistus hara hehelun neu nedenun nara fo rafada memak reu ei ena rae, mete ma sangga losa dae-bafok fai mateꞌen, na, mana makatitiik kara sou mai. Ara hii rakadadaek Lamatuak hihii-nanaun, fo tungga kada sira mesa kasa hihiin mana peko-pakik. 2 Petrus 3:3 19 Hatematak ia, hatahori raa rai ia ena. Ara ndia tusu-hai reu-mai fo tao ei mabingga-baꞌek. Ara bubuluk kada leo-laꞌo tungga hatahori dae-bafok hihiin a mesan, huu Manetualain Dula-dale Malalaon ta nai sira dalen dale.
20 Tehuu toranoo susue nggara ein! Ei muste mambaririik ei masodam neu ei nemehehere malalaom fanderen lain. Fee Dula-dale Malalaok koasa ei aom mara, neu faik fo ei hule-haradoi. 21 Masanenedak, Manetualain sue nalan seli neu ei. De boso lilii-ndondou Ndia susue-lalain naa, no dalak manea ei aom. Ei muste makatataka mahani ita Lamatuan Yesus Karistus natudu dale kasian fo fee ei masoda makandoo mia Manetualain.
22 Ei muste matudu dale kasian neu hatahori fo dale mapanggek. 23 Ei muste tulun neu basa hatahorir mana parluu hambu masoi-masodak, sama leo ei leꞌa falik hatahori numa aꞌi dale mai. Hambu hatahori laen bali, fo ei muste matudu dale susuem neu sara. Besa-besa, ee! Leo mae ei mameda kasian neu sara, tehuu ei oo muste nunute neu manggenggeon nara boe, sama leo hatahori nunute badu manggenggeo kabook. Susura Malalaok dedeꞌa Yunani surak nae, “Boso mafaroe sira badu manggenggeo kaboon nara.” Ia sosoa-ndandaan nae, “Sira leleo-lalaꞌo manggaraun nara ma nenorin nara, boso leꞌa-nore ei.”
Yudas loo lima hatahori kamaherek kara fo Lamatuak nanea sara
24 Hatematak ia ita soꞌuk kokoa-kikiok neu Manetualain!
Huu Ana bisa nanea ei,
fo ei boso tuda.
Ma Ana ndia bisa nuni noo ei,
fo mambariik nai Lamatuak matan,
huu Ana ndia tao ei dadi lolo-laok,
ma ta manggenggeok bali.
Ei mai mia dalem mbena sau-sau,
huu Ndia ta neni babanggak sudi selik kana!
25 Kada Manetualain mesa kana,
ndia dadi Lamatuak tetebes.
Kada Ndia mesa kana ndia tao nasoi-nasoda ita!
Boe ma nesik ita Lamatuan Yesus Karistus,
Manetualain tao nasoi-nasoda ita.
De basa hada-horomatak lalaꞌen feen neun.
Basa ta neni babanggak lalaꞌen, Ndia enan.
Ndia koasan, moꞌon seli.
Ma Ndia haak parendan,
hambun numa lele uluk mai,
ma hatematak ia,
losa doon naa neu.
Tebe! Ndian ena!
Numa au mai,
Yudas

1:1 Mateos 13:55; Markus 6:3

1:5 Kalua numa Masir mai 12:51; Susura Rerekek 14:29-30

1:7 Tutui Makasososak 19:1-24

1:9 Daniel 10:13, 21; 12:1; Dae-bafo Beuk 12:7; Tui Seluk laꞌe-neu Dala Masodak 34:6; Sakaria 3:2

1:11 Tutui Makasososak 4:3-8; Susura Rerekek 22:1-35; 16:1-35

*1:12 Dedeꞌa Yunani nai ia bisa hambu sosoa-ndandaak dua. Esa, Yudas nakasasamak hatahori manggarauk kara sama leo “batu unuk”. Esa bali ana nakasasamak kasa sama leo, “noda mana tao manggenggeok”.

1:14 Tutui Makasososak 5:18, 21-24

1:17-18 2 Petrus 3:3

1:23 Susura Malalaok dedeꞌa Yunani surak nae, “Boso mafaroe sira badu manggenggeo kaboon nara.” Ia sosoa-ndandaan nae, “Sira leleo-lalaꞌo manggaraun nara ma nenorin nara, boso leꞌa-nore ei.”