12
Bina kai naga
12:1-6
1 Eleki au selu tanda elake ndete lanite. Selu tebikele titinai. Bina sae me ialike lapune rebe ekliti saka lemataije kai ikele kena bulane, kai kmalea buai butu esa lesini lua uhita keholi liute me uluije. 2 Ikeu blublulu kai petu kena iruere reneka hoko ibiue le iblake kera titinai.
3 Eleki au selu tanda makete ndete lanite. Selu tebikele titinaije neka. Naga lalakwe ela titinai esi ului itu kai esi sepai butu esa. Liute, papela esi uluiju. 4 Kai esi aluije eneha lara teluke (1/3) kmalea ndete lanite, epoiele lope nusare. Naga mere ekele me bina rebe iono kena iruele kwetele mere oaije leke elelu kwetele. 5 Eleki bina mere iruele kwete mokwai rebe tatike pine ipletae pusue tamata mei nusa meije kena toane bua pesire*Selu catatane kaki 2:26.. Po malekate ihnaku kwetele mere bei binare eleki ikerini loko Alla me Alla Eni otoi maka rue kena pletare. 6 Eleki bina mere inaya lolete otoi nsekile loko otoi rebe Alla Iaknekaele eteije leke pialaeni ete mere musuna telu bulana ne (petua 1.260).
Nagare kala
12:7-9
7 Eleki lisa elake ndete lanite. Malekataru esi elake Mikaele kai eni malekataru esi lisa kai naga mere. Kai naga elake mere supu tapa bei esi malekataru. 8 Po Mikaele ilesi naga mere. Eleki Alla Isuka naga mere kai eni malekataru esi rue ndete lanite moneka. 9 Naga elake mere kai eni malekataru esi supu poie bei lanite lope nusare. Naga mere niakwe ntuane rebe esi nane ro tiare esi elake pise litare esi elake rebe elemake tamata mei pusue nusare.†Ro tiare esi elake kena sou Ibranire, ‘maka tutuke’, yo litare esi elake kena sou Ibranire ‘musu’.
Lagu lesi
12:10-12
10 Kena nagare kai esi malekataru supu poie lope nusare, au lene na elake bei ndete surga be,
“Meije petu kena Alla Ihlamate tamata
rebe hlaleke lokoIje.
Kai meije Alla Itiluke Eni kbasare
leke Ikbasae tamata saka kamale.
Kai meije lekwe Kamale rebe Alla ItalukeNi
kena Ihlamate tamatare ItilukeNi kbasare,
le naga rebe pita kpetu itutuke tamata rame
rebe esi hlaleke loko Tuhane me Alla oaIje,
esupu poie bei ndete surga lope nusare peneka.
11 Iteki tamata rebe esi hlaleke loko Tuhane
esi lesi ro tiaru esi elake peneka
le Domba Anaije Imata
kai Eni lalakwe ponikele kena iteki dosaru.
Kai le rilasi le matale mo
po esi ktili lesi kena lepae Alla Eni lepataru
kena Yesuse.
12 Ele mere hoko pusue rebe rue ndete surgare
suke lalemi ndina.
Po yelu mei nusare supu susate
le ro tiaru esi elake erulu lokomi peneka
kena lale nasute titinai
le irekwa be petu
kena eono neune lau mo pusure reneka.”
Nagare sui binare
12:13-18
13 Kai kena naga mere erekwa be esupu poie mei nusare peneka, esui bina rebe iruele kwete mokwaije. 14 Po bina mere isupu riluke balakibiti saka manu lusi elake esi balakibite leke iribu loko otoi sae me otoi nsekile. Bina mere isupu raka ete mere musuna telu bulana ne leke lau bei naga mere. 15 Eleki naga mere eblutue kwele boka titinai loko bina mere leke kwele emanui. 16 Po nusare tapa bina mere, hoko enana eleki ehmoso kwele rebe nagare eblutuele bei esi biruije. 17 Eleki naga mere enasuke bina mere, eleki ekeu lisa kai bina mere eni anubua maketaru. Mere sie rebe esi lulu Alla Eni pletaru kai rebe esi alenake yelu rebe Yesuse Ionoule. 18 Eleki naga mere ekele ndau laiului.