3
Mutu Yesus nehe ening mona ved hamulang adana
(Matius 12:9-14; Lukas 6:6-11)
1 Ang muse, Yesus bot bale ila Yahudi ehava hamulang mi. Angmi angu Ana uuling se nehe nu ue, atang dena angu aamina. 2 Angmi angu di, nehe aaedeng hula Yesus Evia aalaping Aing ening ahala. Base ini ieng metma Aing taang meat bae alolang niang aulange, ateing hula ved hamulang adana angu Ana bisa nehe angu aing ening mona e, niang.
3 Ang muse Yesus Ana nehe atang dena aamina angu earut hula, “Ma niapang aadang anga mi tahi.” Yesus earut aulang muse, ana ma iapang aadang mi tahi.
4 Ang muse Yesus Ana nehe ang naung emangpi iadang taaning hula, “Piagama elamal-etahi eamulung se, naba ba ved hamulang omimi pi ening? Pi aaung-hama ba ening e, jasi-ahala ba ening? Pi nehe ening mona e, nehe ameang?” Aarunge ini mang taimang.
5 Nehe ang naung iagama elamal-etahi anguba eamulung mieele, aarunge ini bae iomi metma nehe ba atang dena aamina angu ejahi niang. Anguba Yesus Omi etatabit dira. Ang muse Ana omi alil Eng metma ing emangpi iuling, senge Ana nehe angu at mateng hula, “Aaungba, aatang angu horuk!” Nehe angu ana atang horuk muse, mibaroti se, atang angu mang mona. 6 Ang muse, nehe Farisi ang naung hava hamulang angmi kaluar hela ila. Ini ila nehe ba Herodes eamulung ang naung imampi tominu, aulange Yesus Evia aalaping Ameang.
Mutu Yesus dano eadil mi nehe toang ening mona
7-8 Ved nu adana, Yesus bot Egahing vala ang naung imampi ila dano Galilea eadil mi. Aarunge naba ba Ana ening angu nehe toang vengmee tila, angu ebele aabang-aabang ba angmi angu enehe ang naung hoa Amulung. Ini propinsi Galilea, propinsi Yudea, bot propinsi Idumea mi hoa. Nehe eabeung ang naung bendar Yerusalem, bendar Sidon bot bendar Tirus mi hoa. Bot nehe iiba angu Yarden eved danang oa angmi hoa. Ing emangpi Yesus Aing aalaping hoa hula Aing harak. 9 Aarunge nehe toang amara angu ebele, Yesus Ana Egahing vala ang naung iot je nu vengharaka, senge Ana je ba taang nehe toang angu iat mateng, aulange ing emangpi vengmee, bot Ana bae bir apolil niang.
10 Turang mi Ana nehe dila toang ening mona tila. Angu ebele, angase nehe dila ba toang angu hoa taing eetek tasekat lamal malekang Aing dei hengi.✡Markus 4:1; Lukas 5:1-3 11 Nehe ba setang iapang taang ang naung uuling ateing muse, ini bat hela iakuku muding Yesus Apang aadang mi. Ang muse ini moring hula, “Aaing anga etatabit Lahatala Oal!”
12 Aarunge Ana ihapat etatabit hula, “Iini ekang nehe iiba iat mateng hula, Naing anga nuba ekang!”
Mutu Yesus nehe arinu belta aalu vengtalail metma Egahing vala ening
(Matius 10:1-4; Lukas 6:12-16)
13 Ang muse Yesus Ana dol nu taang mida. Nehe aaedeng ba Omi vengba angu Ana iarut Ebele hoa. 14 Ang muse Ana inang arinu belta aalu vengtalail. Ana iat mateng hula, “Na iing vengtalail e iini Namulung. Na iing vengtalail aulange iini ila Lahatala Evomung-epahang angu metma nehe toang emangpi vengimaring. 15 Bot Nekavasa angu Na metma ma iinang senge, nehe ba setang iapang taang ang naung iini setang angu aterit iola.”
16-19 Nehe arinu belta aalu angu iene alang:
Simon (ba Yesus ene maveng Petrus),
Yakobus,
Yohanis, (Yakobus bot ekaku Yohanis oleve angu, Sabadeus oal. Oleve Yesus iene maveng ꞌBoanergesꞌ, evengbanang se, ꞌemenghula burang dumung edadenangꞌ.)*a: Yunani ehur mi hurak hula ꞌburang dumung oalꞌ, evengbanang hula ꞌilamal-itahi angu emenghula burang dumung edadenangꞌ. Anguba nehe omi venang aaedeng hula, Yakobus bot Yohanis ole alil se, iamal angu emenghula burang dumung edadenang,
Andrias,
Pelipus,
Bertelemius,
Mateos,
Tomas,
Yakobus (ba Alpius oal angu),
Tadius,
Simon (ba partei Selot eamulung angu),†b: Partei Selot angu nehe ba bae parenta eamulung niang. Anguba nehe partei Selot eamulung ang naung, via aalaping hula ekang Roma eparenta angu eamulung ekang, senge ini ilva. Angu ebele ini partei Selot angu ene maveng hula ꞌPatriotꞌ.
bot Yudas Iskariot (aing ba eningse Yesus Evia aalaping abaang angu).
Guru agama ang naung Yesus Aing ening ahalat hula, angu setang enehe eele ba kavasa metma ma Enang
(Matius 12:22-32; Lukas 11:14-23; 12:10)
20 Ang muse, Yesus bot Egahing vala ang naung dol angu taang bale hela muse, ini hava nu mi mida. Aarunge nehe toang rae bot hoa Aing vengkumpul, anguba Yesus iimal bae naadang jadi niang. 21 Ateing aulang muse, nehe nu mateng hula, “Iini Yesus euling hengi. Ana Apang ahala tila.” Yesus Ehava omi enehe ang naung vengmee se nehe Aing vengbanang aulang muse, ini hoa hula Aing medit At ila.
22 Uangu adana, guru agama ba Yerusalem mi ang naung hoa, senge nehe angmi ang naung iat mateng hula, “Ee! Iini ekang Yesus angu Eamulung ekang. Setang enehe eele ba nehe earut hula Balsebul anguba apang taang, bot kavasa metma ma Enang ba Ana setang di ateri angu.”✡Matius 9:34; 10:25
23 Yesus vengmeet ini mateng aulang muse, Ana ing emangpi iaru e, iat mateng hula, “Bae Nenomi adana niang! Tatalange, setang enehe eele angu ana ava ateri! 24 Aabang nu omimi enehe ang naung itat tota bot iomi teahalang se, tatalange aabang omi angu tening bot aabang angu kilang eaing sehi! 25 Bot hava nu omimi enehe ang naung iomi teahalang se, tatalange ihava omi angu tening bot hava omi angu kilang eaing sehi! 26 Setang ang naung di aulang, nu omi metma nu ealalil se, ini malekang tarae-teapahing base ini tibarakang-temarai bot bae taing harak niang!
27 Nehe hula hoa nehe daeri nu ehava mi na taavi se, ana malekang nehe daeri angu aing partat ematura, senge ana nehe epasaka angu taavi.‡Yesus vengbanang aulang angu, Ana hula Aing angu midaeri, bae setang enehe eele ba ini earut hula ꞌBalsebulꞌ angu edadenang niang.
28 Base Na iiat mateng minu: Lahatala Ana vengharakat nehe eahalang vengahi. Bot nehe iiba hura mananti bot jasi-ahala ening metma nehe aabeung adana di, Lahatala kilang vengharakat iahalang aulang angu vengahi. 29 Aarunge nehe ba Lahatala ERoh hamulang ehura emananti angu, aing eahalang angu por venghola di, Lahatala bae vengahi niang!”✡Lukas 12:10
30 Ini Aing vengbanang hula, “Nehe angu setang apang taang iila!” Angu ebele Yesus vengbanang aulang.
Nehe ba Lahatala Eomi Eamulung aing angu etatabit Yesus Ekaku Eserang
(Matius 12:46-50; Lukas 8:19-21)
31 Ang muse, Yesus Iva bot Ekaku ang naung, hoa hava angumi hula Aing harak. Angmo mi ini via eela ba mi tahi e nehe ot Earu. 32 Yesus mihit nehe toang angu iavomung-iapahang sehise, nehe hoa At mateng hula, “Nimang! Iiva bot Eekaku ang naung ae via eela mi Aading sehi. Ini hula Aaing harak.”
33 Aarunge Yesus ibalet hula, “Niva bot Nekaku mamolo angu, nuba?”
34 Ang muse nehe toang ba mihit Aing venggoleng angu Ana iuling, senge iat mateng hula, “Iing emangpi anga ba Niva bot Nekaku Neserang emamolo. 35 Nehe ba Lahatala Eomi angu eamulung, aing angu ba, etatabit Nekaku bot Neserang.”
✡3:10 Markus 4:1; Lukas 5:1-3
*3:16-19 a: Yunani ehur mi hurak hula ꞌburang dumung oalꞌ, evengbanang hula ꞌilamal-itahi angu emenghula burang dumung edadenangꞌ. Anguba nehe omi venang aaedeng hula, Yakobus bot Yohanis ole alil se, iamal angu emenghula burang dumung edadenang,
†3:16-19 b: Partei Selot angu nehe ba bae parenta eamulung niang. Anguba nehe partei Selot eamulung ang naung, via aalaping hula ekang Roma eparenta angu eamulung ekang, senge ini ilva. Angu ebele ini partei Selot angu ene maveng hula ꞌPatriotꞌ.
✡3:22 Matius 9:34; 10:25
‡3:27 Yesus vengbanang aulang angu, Ana hula Aing angu midaeri, bae setang enehe eele ba ini earut hula ꞌBalsebulꞌ angu edadenang niang.
✡3:29 Lukas 12:10