Timutius 1
Surat laih hmunan
deng Paulus bel un tapa Timutius
1
Boa-blingin
1-2 Timutius man in banan!
Boa-blingin deng au, Paulus. Ama Lamtua Allah nikit auk son, le daid Yesus Kristus atulin in nutus. Nol kit in nahlae se Lamtua Yesus sa, man tao kit le nuling napiut nol Una, undeng Ama Lamtua Allah bel boa-blingin kit son deng kit in kula-sala ngas.
Tius, ku niam banansila el auk anang esa, undeng auk man tulu lalan le ku kon parsai se Kristus. Auk kohe-kanas nodan Ama Lamtua Allah, kit Aman na, nol Yesus Kristus, kit Lamtuan na, le tulu bel ku Oen dalen banan na nol dalen in namnau ka, halin nam ku nuil titu-tema nol dame.✡ Dehet deng Aan in Nutus sas 16:1
Doha-tiud nol atuil in tui-tikang tom lo ngas
3 Dedeng na kit duat leo-leo se kota Efesus. Nikit auk le noan lakong bus el propinsi Makedoniang nga, auk dising ku le dada se kota Efesus. Ta dedeng na, muik atuli deeh man tui liun jemaat tas nini dais in tom lo ngas. Tiata, auk nodan le ku laok kaing one, halin oen tui napiut ela deken. 4 Hidim atuli las kon soleng oras ela tukun, le laok nahdeh apa deng dehet man in muik nahin lo. Oen kon kaen apa tutungus se in tik dehet deng in hua-koet tas. Dais tuladang ela ngas suma tao atuli li le keng apa tukun, hidim tao oen le nuil nol in parsai se Ama Lamtua Allah lo.
5 Auk tui-tek ku elia, le halin nam ku tui atuil in parsai ngas, le oen nuil nol in neka-namnau apa nini dael niu, in nangan lolo, nol deng in parsai baktetebes.
6 Mo muik guru teng sisa katang son, le nang soleng in tui-tikang nas. Oen soleng oras le kaen apa tutungus nol aa dahu-dahut si-sii. 7 Oen tek le oen nam mo, guru man in tui atuil didang deng upung Musa Atorang ngas. Oen tao apan nas el guru tene ka, mo oen taan asa man oen in tui ka nahin na lo.
8 Kit totoang tana noan, upung Musa Atorang ngas totoang banan! Sadi kit pake Atorang nas muid Ama Lamtua Allah in koma ka. 9 Atorang nas dulas taung atuil in nuil lolo son nas lo. Molam dulas le bel atuil in labang daat tas, atuil in dai hii-ming in prenta lo ngas, atuil in nuil katang deng Ama Lamtua ngas, in kom le daek dadaat tas, in toe muid Ama Lamtua lo ngas, in ngat maat halin tuun nol sa-saa niu ka ngas, in keo tele atuil tutungus sas, nol in keo tele un ina-aman nas esan nas. 10 Atorang nas kon dulas bel: atuil in nong dadahut daat tas, bikloeb in niin bali nol biklobe ngas, bihata mo niin nol bihatang ngas, in daek buni atuil didang halin nuting le haup duit tas, in liun-leo atuil daat tas, daid saksi in nole-lilung ngas, nol bel totoang atuil man labang nol in tui man toma ngas. 11 Tui-tikang in toma ngas, maas deng Ama Lamtua Allah Dehet Dais Banan, man Un bel auk son na. Ama Lamtua Allah na mo, muun isi. Ta eta atuli li nikit sakeng Un ngala ka lapa-lapa kam, meman toma!
Nodan mamo se Ama Lamtua undeng Un dalen na banan
12 Auk nodan mamo-mamo se kit Lamtuan Yesus Kristus, undeng Un parsai au, nol bel auk le lako-daek nal Un osa la. 13-14 Molota hmunan nu, auk aa dadaat le tao nahu Yesus ngala ka, nol tao susa-daat saol atuli-atuil man in muid Un lalan in nuli ka ngas. Auk tudan-kida oen tutungus. Auk daek dadaat ela undeng oras na, auk nangan taan asa man auk in dakeng nas lo, nol parsai se kit Lamtuan Yesus Kristus lo bii. Mo Ama Lamtua nadidingun auk lo, nol tulu Un in namnau ka bel au.✡ Dehet deng Aan in Nutus sas 8:3; 9:4-5 In dudui pait ta, Un tulu bel auk Un dalen banan na tutungus! Un bel auk hangun liis-lasa, le halin auk parsai muun se Una, nol namnau nal atuil didang, banansila el Un in namnau au ka kon.
15 Taom kit ming oe-oe son noan, “Yesus Kristus maa se apan-kloma ki son, le bel boa-blingin atuil in tao kula-sala ngas.” Meman ela baktetebes! Molam deng totoang atuil in daek kula-sala ngas, auk man daat dui hihidi. 16 Auk daat isi ela kon no, Ama Lamtua Allah nutus le hukung auk lo. Molam Un le pake au, halin tulu-balang Yesus Kristus in keeh nol atuil man daat isi, banansila el au lia ngas. Nini ela lam, atuil didang in tao kula-sala ngas kon parsai se Una, le halin oen haup in nuli napiut nol Una.
17 Naka Ama Lamtua!
Ta suma Un sii, man Allah;
muik didang pait lo!
Un nam Lahing man in kil prenta hidi nutus taan lo ka.
Un man nuli didiin son na.
Un man mate lo ka.
Un man atuli li ngat netan nini matan lo.
Totoang in todan, nol in naka ki taung Una,
ela son na!
Amin.
18 Ana Timutius man in banan! Auk le tek ku deng asa man ku musti daken se ku osa las. Nias totoang muid asa man Ama Lamtua mee-baha las in tek meman son deng ku apam ma ka. Eta ku muid in teka-tekang nas nol babanan nam, na banansila el tentara mesa, man hote-dait tana, le labang in daat tas. 19 Kil dididi ku in parsai Kristus sa. Nol doh le halin nam ku dalem ma niu tutungus. Ta muik atuli deeh dai hii muid oen dalen nas in teka ka pait lo son, man tao oen in parsai ka le sisake banansila el kapal in saek tom baut alo ka. 20 Himeneus nol Aleksander kon tuladang ela! Tiata auk sao soleng oen lakos se uikjale kas tuang tene ka. Auk tao ela, le tui one, halin oen tenes deng in tao didaan Ama Lamtua ngala ka.