2 Petrus
Horok Lirna La'an
Petrus hi'i horok ida wali'ur aku laa ri Kristen man min lolo propinsi Asia Tatana, de rin wekel horok eniyeni Petrus nin horok rewro'o nine.
Lolo horok eni Petrus nin panaeku ma na'ono, ra'okuledi meser agama man wakuku panaeku ma ka namlolo. Petrus na'ori honorok ri Kristen lolo onne leke yon hir derne rakani meser man ailanna onnenihe rir wanakuku ma ka namlolo. An ken na'alapa hi akin leke hi eren ramkene lernohi Makromod Yesus, la rasala kerkerhe Makromod Yesus Nin wanakuku ma namlolo. Wanakuku ma namlolo onne, ri man mehen do'on derne Makromod Yesus loikaru hi.
Petrus akin werek ono meser ma ka namlolo wakuku heheni: Yesus nou nahenia An mai wali'ur, maa Ai kan mai makun, de Ainin nou kan min haida (3:3-4). Petrus na'aheni rir wanakuku onne sala wake'e ono lolo Makromod Lalap Nin honorok panaeku alam ida naise alam riwan ida, la Ai kan huri Yesus mai makun ono Ai mahan weilapan ri na'akeme herredi rir morimori ma ka namlolo eni. Ai raram nodi yon ri mahaku lernala hunukum makmaki nako'uwedi Ai (3:8-9), maa onne lo'o ka namwali ono ri aile ma namhene derne nakani Ai. Enimaa rakan lere alam man Ai mehen nili, Makromod Yesus namlolo kokkoo mai wali'ur nano'onyaka noho wawan man ailanna eniyeni (3:10).
Horok Ihin
1. Petrus nala wanakunu man hari horok (1:1-2).
2. Petrus nounaku ika ma akin naili'il kahehe hi'i ha ma namlolo mamani (1:3-21).
3. Petrus nounaku ika yon derne kakani meser agama ma ka namlolo (2:1-22).
4. Petrus na'ori honorok ika na'aheni Yesus Kristus namlolo kokkoo mai noho wawan wali'ur (3:1-13).
5. Petrus nala wanakunu man horu (3:14-18).
1
Petrus nala hiyene aroro
I wal'u na'ahoru ma noro mayai akin naili'il kokkoo Yesus Kristus! Ya'u eni Simon Petrus, la ya'u hi'i horok eni aku ki mi ma akin naili'il Kristus, la ya amwali Ainina hophopon wahwahan noro Nin hophopon ma nodi Lirna Wawa'an eni. Yesus Kristus eni namwali ik Makromod Lalap noro idewe iknik Rai man huri we'er ika nano dohohala nin molollo. An hi'i ik akin naili'il wawa'an, ono Ai penia man hi'i ha ma namlolo mamani. Ya apanak Makromod Lalap hi'i mi akim eren moiliwi mahuwele, la nala Nina rere'e haharu eren nammomori ki mi na'ahoru ono mi mauroinedi Makromod Lalap noro Ik Makromod Yesus Kristus me'e.
Mahehe leke eren mauroroin Makromod Lalap man polu maika kamwali Nin ri
Makromod Lalap nodi Nin molollo man lewlewen na'aruri ik akin, la nala ha wo'ira na'akeme man paku maika leke iknik morimori namlolo mamani lolo Ai leken kalarna, leke ik kauroin hi'i wewhe Nin honorok aki mamani. Onne namwali ono ik kauroinedi Ai me'e. Ai onne, Nin morimori ma'aruru rehi, la akin wa'an wake'e. Nano Ai akin man wa'an noro Nin morimori man ma'aruru onne, Ai napolu ika kamwali Nin ri, la nala Nina nou man ma'aruru rehi ma na'ono wake'e maika. Lolo Nin nou onne, An huriyedi mi nano noho wawan nin monmono kamanna ma nodi ri laa yakanne, la nala mormori man wa'an wake'e ki mi, leke moro Ai mamwali mahaku la minim morimori teunohi Nin morimori man ma'aruru wake'eni.
Makromod Lalap nala rere'e haharu man lewlewen onne, de mi ma akin naili'il Ai, mahehe hi'i ha ma namlolo mamani. Enla mi man hi'i ha ma namlolo mamani, mahehe eren mauroroin ewi man wa'an noro ewi man sala. Mi ma nauroin ewi man wa'an noro ewi man sala, mahehe madiyaka mi kemen leke yon hi'i ha man sala me'e. Mi ma nauroin nadiyaka kemen mamani, mahehe leke eren mamkekene lolo wewerek pananaka. Mi ma namkenedi me'e enihe, mahehe leke lernohi Makromod Lalap Nin honorok panaeku mamani. Mi man lernohi Makromod Lalap Nin honorok panaeku mamani, mahehe maramyak ri heri ri wali naise mi walinhe mememen. Mi ma naramyaka ri heri ri wali, mahehe eren mararamyaka ri mormori wali na'akeme. Lo'o minim morimori naise onne na'akeme, la mi mahehe leke minim morimori eren wawa'an, onne nin panaeku nahenia mi mampe'el ilitolle Nin honowok wawa'an, la mim lernohi Nin honorok panaeku mamani, ono namlolo kokkoo mi mauroinedi ik Makromod Yesus Kristus wawa'an me'e. Enimaa ri ma nin morimori ka naise onne, makan na'akeki toko me'e, de kan do'on haida mouropo, ono hamlinuwedi nahenia Makromod Lalap na'amouwedi hi nano rir dohohala man hir hi'iyedi nonolu eni.
10 Ende I wal'u na'ahoruwedi, Makromod Lalap napolu la niliyedi mi mamwali Nin ri, de mahehe lernohi Nin honorok panaeku mamani, leke namwali tanada nahenia namlolo kokkoo mi mamwaliyedi Nin ri me'e. Lo'o mim hi'i heheni, mi ka madiyaur dohohala, maa mi akim eren nailili'il Makromod Lalap, 11 la lere man mai An kokala mi wawa'anedi lolo onno man ik Makromod Yesus Kristus ma namwali iknik Rai Ma Nala Or'ori Dardari eni nodi molollo laa ewi-ewi.
Petrus nounaku hi yon hamlinu wanakuku ma namlolo
12 Ende I wal'u na'ahoru, kade mi mauroin mouwedi ha eniyenihe me'e, la mi mamkene lernohiyedi wanakuku ma namlolo man mim dernedi me'e, maa ainu'u panaeku ya a'ori honorok mi mamani ha ma na'ono eniyeni. 13 Ya auroin nahenia wa'an rehi ya a'ori honorok mi mamani hehen nanumene ainu'u lere horu, 14 ono Makromod Yesus Kristus konohiyedi ya'u nahenia ka nalo'olo i maki me'e. 15 Ende ya ahehe wakunu ha eniyenihe na'akeme mouropo, leke lo'o ya'u makiyedi, mi kam hamlinu me'e.
16 I wal'u na'ahoru! Am wakukuwedi mi nahenia ik Makromod Yesus Kristus nodi molollo ma narehi ma nalewen, la lere man mai An wali wali'ur mai noho wawan eniyeni. Ai kam nair wanakunu ma namwali ri mormori rir wanakunu koirwakar mehe, maa ha ma namlolo kokkoo, ono ai mehem do'on Yesus kemen siksik lerlere. 17 Am do'on onne lere nonolu, ono ai moro Yesus min wewerre lolo wo'or ida. Lere onne Ai Aman Makromod Lalap Man Siksik Lerlere nala honoor hanawe la na'akulu na'alap Yesus. Ai nodi lira man lapa na'aheni, “E'eni Ya An'u man Ya aramyake. An hi'i Ya akin nahuwa'an wake'e!” 18 Enla ai mehem derne lira lalap onne mai nano a'am raram lere ai moro Yesus min wewerre lolo wo'or man moumou dewdewe onne.
19 Am do'on mauroin onne, penia ai mauroin nahenia ha wo'ira na'akeme man Makromod Lalap konohiyedi nabi-nabi nonolu eni namlolo kokkoo. Wa'an rehi mim derne makani nabi lirna onneni, ono lirna onne naise wadu man mormori lolo noho momohon eni rakan lere Kristus mai wali'ur. Ler Kristus mai onne naise lere ha'edi me'e de ropedi noho wawan na'akeme, la naise kaliyoro nokimur hikan lolo mi akim, penia mim do'on mauroin ha wo'ira na'akeme mouropo. 20 Eniyeni ha ma na'ono wake'e! Yon hamlinu nahenia Lirna Wawan man horokedi lolo Horok Lap raram kan mai nano nabi onnenihe rir honorok panaeku aimehi, maa mai nano Makromod Lalap.* Tafsiran namehin na'ahenia, ‘Yon hamlinu nahenia Lirna Wawan man horokedi lolo Horok Lap raram mai nano Makromod Lalap, de yon ik kodi ik honorok panaeku aimehi napa'aha.’ 21 Nabi onnenihe kar lernohi ri mormori nin honorok panaeku mehe, maa Roh Kudus penia ma nodi nala hi, de hir loikaru Makromod Lalap Lirna mememen lolo Horok Lap eni.

*1:20 Tafsiran namehin na'ahenia, ‘Yon hamlinu nahenia Lirna Wawan man horokedi lolo Horok Lap raram mai nano Makromod Lalap, de yon ik kodi ik honorok panaeku aimehi napa'aha.’