18
Tuhan Allah pung ana bua carita kota Babel pung rubu
1 Ais itu, beta dapa lia satu ana bua laen turun datang dari sorga. Dia ada pung kuasa deng cahaya yang hebat sampe bekin taráng samua bumi. 2 Dia pake suara bésar ko kasi tau bilang,
“Su rubu! Su rubu! Kota Babel su rubu!
Su jato! Su jato! Itu kota hebat tu, su jato!
Dia su jadi setan dong pung tampa tenga.
Dia su jadi samua roh jahat dong pung tana asal.
Dia su jadi samua burung tukang makan bangke pung tampa bakumpul.
Dia su jadi samua binatang tar bae pung kandang.✡ Yesaya 21:9; Yeremia 51:8; Dunya Model Baru 14:8; Yesaya 13:21; Yeremia 50:39
3 Dia su rubu, tagal samua suku-bangsa di bumi,
maen datang minum mabo dari dia pung anggor.
Dia su jato, tagal samua suku di dunya,
maen datang basundal deng itu kota pung orang.
Raja-raja dari samua negara dong,
datang maen serong di situ.
Orang dagang dari samua kota dong,
datang bajual sampe dong su jadi kaya.
Tagal itu kota sama ke parampuan yang suka béli samua yang mewa.
Tagal itu kota sama ke palacor yang suka cari samua yang ena-ena.”✡ Yesaya 23:17; Yeremia 51:7
4 Ais beta dengar lai satu suara laen pange dari langit bilang,
“Hoi! Beta pung orang dong samua!
Lari kaluar dari sana su!
Kasi tenga itu kota su!
Jang bekin iko itu kota pung orang pung jahat,
ko jang kaná dong pung hukuman ju.✡ Yesaya 48:20; Yeremia 50:8, 51:6, 45
5 Tagal dong pung jahat
su talalu banya.
Deng dong pung sala
su balapis-lapis sampe di langit.
Sakarang Tuhan Allah su sonde lupa lai
dong pung jalan idop yang jahat.
Sakarang Tuhan Allah su siap
ko mau hukum sang dong.✡ Carita Mula-mula 18:20-21; Yeremia 51:9
6 Jadi bosong musti balas dong pung jahat,
sama ke dong su bekin jahat sang orang laen.
Ma bosong musti balas sang dong,
sampe dua kali lipat.
Dolu dong tipu orang,
ko minum dari dong pung cangkir mas yang ponu deng anggor sangsara.
Ma sakarang dong sandiri yang musti minum
itu anggor sangsara, sampe dua kali lipat.✡ Lagu Puji dong 137:8; Yeremia 50:29
7 Dong su bekin diri hebat.
Deng su angka tinggi-tinggi dong pung diri.
Dong cuma mau idop mewa sa.
Dong cuma suka yang ena-ena sa.
Tagal itu, dong musti dapa susa barát.
Jadi dong musti idop sangsara.
Te dolu dong omong sombong sama ke palacur bilang,
‘Beta ni, mama raja!
Beta sonde akan jadi janda!
Beta sonde akan manangis makarereu.
Beta sonde akan pake pakean itam.’
8 Dong omong bagitu sampe Tuhan Allah su mara sang dong.
Sampe Tuhan Allah su mau hukum sang dong.
Nanti dalam satu hari sa,
dong rasa lapar mau mati,
dong manangis makarereu,
deng dong mati mampos ju.
Sampe orang angka buang sang dong pi dalam api.
Sampe api bakar abis dong pung mayat.
Te Tuhan yang paling kuasa, yang kasi turun ini hukum.
Deng Tuhan yang paling hebat, yang putus ini parkara.✡ Yesaya 47:7-9
9 Raja-raja yang dolu datang
maen serong deng itu kota pung orang dong,
deng idop mewa di situ.
Nanti dong lia asap yang nae dari itu api,
nanti dong dapa tau itu kota su tabakar abis.
Ais dong manangis makarereu sang dia.
10 Ju dong rasa ngarí lia itu orang dong pung sangsara.
Ma dong cuma barani badiri dari jao.
Deng dong cuma barani lia-lia dari sana.
Ais dong omong bilang,
‘Aduu! Kasian Babel, é!
Aduu! Kasian kota hebat, ó!
Te cuma dalam satu jam sa, lu su dapa hukum.
Te cuma sabantar sa, ma lu su ancor buang.’✡ Yeskial 26:16-17
11 Dengar bagitu, orang yang dolu datang dari samua tampa ko badagang di situ,
dong ju iko manangis makarereu.
Te sonde ada satu orang ju,
yang mau pi béli dong pung barang lai.✡ Yeskial 27:31, 36
12 Sonde ada yang mau pi béli
dong pung hiasan dari mas, perak,
batu mangkilat, ko, mutiara lai.
Sonde ada yang mau pi béli
dong pung kaen lenan, kaen sutra,
ko, kaen alus yang laen dong yang warna mera, ko, ungu.
Sonde ada yang mau pi béli
dong pung barang dari kayu wangi, gading baꞌukir,
ko, kayu baꞌukir yang laen dong.
Sonde ada yang mau pi béli
dong pung barang dari tambaga, bési, ko, batu marmar.
13 Sonde ada yang mau pi béli
dong pung kayu manis, ko, kuli manis macam-macam.
Sonde ada yang mau pi béli
dong pung dara kayu wangi, ko, minya wangi macam-macam.
Sonde ada yang mau pi béli
dong pung aer anggor, minya saitun,
tapúng tarigu, ko, padi-gandum.
Sonde ada yang mau pi béli
dong pung sapi, domba, ko, kuda.
Sonde ada yang mau pi béli
dong pung kareta,
ko, dong pung budak dong.✡ Yeskial 27:12, 13, 22
14 Nanti itu orang dagang dong rasa manyasal bilang,
‘Aduu, Babel, é!
Aduu, kota hebat, ó!
Lu pung barang mewa yang lu pung orang dong paling suka tu,
su sonde ada lai.
Samua-samua su ilang, sampe dong su miskin malarat,
sampe raroso.’
15 Dolu itu orang dagang dong jadi kaya tagal itu kota yang sama ke palacor.
Ma sakarang dong su manyasal tar abis-abis.
Dong jadi taku mau mati,
lia itu kota pung orang pung sangsara.
Dong jadi talalu ngarí,
lia dong pung hukuman.
Ma dong cuma barani lia dari jao.
Dong cuma barani badiri dari sana.
16 Ais dong omong bilang,
‘Aduu! Kasian Babel, é!
Aduu! Kasian kota hebat, ó!✡ Yeskial 27:31, 36
Dolu lu pung orang pake pakean alus yang warna mera, ko ungu,
dari kaen yang paling mahal.
Dolu lu pung orang barias deng mas, mutiara,
deng batu mangkilat yang paling mahal.
17 Ma dalam satu jam sa,
lu pung barang-barang dong su sonde ada lai.
Cuma sabantar sa,
lu pung kaya dong su ilang abis!’
Dolu ju ada kapten-kapten kapal deng ana bua kapal dong
balayar pi-datang dari itu kota.
Ma sakarang dong cuma barani balabu dari jao sa.
Deng sakarang dong cuma barani lia-lia dari sana sa.✡ Yesaya 23:14; Yeskial 27:26-30
18 Dong manonton asap yang kaluar dari api.
Ais dong dapa tau bilang, dia su tabakar abis.
Ju dong manyasal bilang,
‘Aduu kasian! Sonde akan ada kota laen
yang sama hebat ke Babel lai.
Aduu kasian! Sonde akan ada kota laen,
yang sama bagus deng dia lai.’✡ Yeskial 27:32
19 Dong raꞌu abu ko taro di dong pung kapala
tagal dong pung hati susa.
Dong manangis makarereu,
tagal dong pung hati ancor.
Ais dong omong bilang,
‘Aduu! Kasian Babel, é!
Aduu! Kasian kota hebat, ó!
Botong su balayar pi-datang bawa barang kasi sang lu,
sampe botong ju iko jadi kaya.
Botong su pikol bawa lu pung muatan,
sampe botong ju iko idop mewa.
Ma cuma dalam satu jam sa,
samua tu, su ilang buang.
Cuma sabantar sa,
samua tu, su ancor abis.’✡ Yeskial 27:30-34
20 Ais, itu suara omong tamba bilang,
‘We, bosong yang idop di sorga!
bosong pung hati su sonde parlú manoso lai.
We, Tuhan pung orang!
Bosong pung hati su sonde parlú rasa susa lai.
We, Tuhan pung utusan dong!
Biar ko bosong pung hati babunga.
We, Tuhan pung jubir dong!
Biar ko bosong pung hati sanáng.
Dolu Babel bekin susa sang bosong.
Dolu itu kota siksa sang bosong.
Ma sakarang Tuhan su balas bosong pung sangsara.
Te sakarang Dia su balas itu kota pung jahat.’ ”✡ Carita Ulang soꞌal Jalan Idop 32:43; Yeremia 51:48
21 Ais itu, beta dapa lia satu ana bua dari sorga yang kuat batúl. Dia datang angka ame satu batu, bésar sama ke orang. Ais dia lempar kasi maso itu batu pi dalam laut. Dia ju kasi tau bilang,
“Nanti dong kasi ancor buang Babel bagitu ju.
Nanti dong kasi ilang buang itu kota hebat bagitu ju.✡ Yeremia 51:63-64; Yeskial 26:21
22 Su sonde ada orang lai,
yang maen musik di itu kota.
Su sonde ada orang,
yang dapa dengar sasando, gitar, suling,
deng tarompet pung bunyi di itu kota lai.
Su sonde ada tukang,
yang karjá di dong pung bidang lai.
Su sonde ada orang,
yang mol padi di itu kota lai.✡ Yeskial 26:13; Yesaya 24:8
23 Su sonde ada orang,
yang bakar lampu di itu kota lai.
Su sonde ada orang,
yang bekin pesta kawin di situ lai.
Dolu itu kota pung tukang jual-beli barang dong,
su jadi talalu kaya.
Dolu Babel pung orang dagang dong,
su idop talalu mewa.
Ma dong pake ilmu galáp,
ko tipu orang di bumi.
Dong pake ilmu sihir,
ko putar-balek manusia di dunya.✡ Yeremia 7:34, 25:10
24 Babel su dapa hukum barát ni,
tagal dia maen bunu bekin mati Tuhan pung jubir dong.
Itu kota hebat su ancor,
tagal dia maen siksa mati Tuhan pung orang dong.
Ada ju Tuhan pung orang yang kaná bunu di tampa-tampa laen dong.
Ma Babel yang musti pikol itu sala samua.
Itu kota hebat yang musti pikol tanggong-jawab.”✡ Yeremia 51:49
✡18:2: Yesaya 21:9; Yeremia 51:8; Dunya Model Baru 14:8; Yesaya 13:21; Yeremia 50:39
✡18:3: Yesaya 23:17; Yeremia 51:7
✡18:4: Yesaya 48:20; Yeremia 50:8, 51:6, 45
✡18:5: Carita Mula-mula 18:20-21; Yeremia 51:9
✡18:6: Lagu Puji dong 137:8; Yeremia 50:29
✡18:8: Yesaya 47:7-9
✡18:10: Yeskial 26:16-17
✡18:11: Yeskial 27:31, 36
✡18:13: Yeskial 27:12, 13, 22
✡18:16: Yeskial 27:31, 36
✡18:17: Yesaya 23:14; Yeskial 27:26-30
✡18:18: Yeskial 27:32
✡18:19: Yeskial 27:30-34
✡18:20: Carita Ulang soꞌal Jalan Idop 32:43; Yeremia 51:48
✡18:21: Yeremia 51:63-64; Yeskial 26:21
✡18:22: Yeskial 26:13; Yesaya 24:8
✡18:23: Yeremia 7:34, 25:10
✡18:24: Yeremia 51:49