Kapenduanna Suha'na Paulus lako Jumaa' dio Tesalonika
Bätäna issinna
Inde suha' natuli' Paulus napakatuam jumaa' dio Tesalonika. Wattu eta too buntä bäbäpi pikkihanna jumaa' dio Tesalonika umpikki' diona kasuleanna Puang Yesus kapenduanna, aka nasanga lambi'um wattunna. Naua Paulus sala punala ke ma'pikki' susii. Iam too napolalam anna natuli' polem inde suha' kapenduanna Paulus anna napakatui lako jumaa' dio Tesalonika, aka la napomakalesoam kaha-kaha ia too anna mala masiä' illaam penabannai, indana sikaputu bäbä liui ma'pikki', nasuhum kabeba penabanna. Anu' la napomakaleso Paulus naua ahena indo kasuleanna sule Puang Yesus kapenduanna la sondä' längäm langi' gau' kakadakeam illaam lino susinna: la deem tau umbahoi sanganna Puang Yesus, anna la deem kende' tau to handam kadake gau' la umbali Puang Yesus.
Nate'geham Paulus illaam inde suha'na lako ingganna to umbatai la mennumpu illaam kamatappasam matoto' lako Puang Yesus moi anna ussi'dim pi'di' muoloi katuboam. Anna nanännä' Paulus diona pahallu bassa' mengkähä umpeä katamaam bahokona, susi indo napogau' Paulus sola ingganna sababanganna. Anna la sangngim manontom anna tä' mali-malisam ma'gau' mapia.
Lesoanna issinna
1. Kada passu'bä' (1:1-2)
2. Pa'kuhhusam sumanga'na Paulus längäm olona Puang Allataala aka tuttuam ungkatappa'i Puang Yesus anna tuttuam sikamase-mase to Tesalonika (1:3-12)
3. Pepa'guhuanna Paulus diona kasuleanna Puang Yesus ma'penduanna (2:1-12)
4. Ma'kuhhu' sumanga' Paulus längäm olona Puang Allataala kahana indo to matappa' napilei la napasalama' (2:13-17)
5. Pelauanna Paulus la napa'sambajangam to Tesalonika (3:1-5)
6. Pepakilalaam lako to busungam mengkähä (3:6-15)
7. Kada pebubunna Paulus (3:16-18)
1
1 Inggannakoa' solasubungki itim jumaa' Tesalonika umma'na Puang Allataala Ambeta anna Yesus Kristus Debatanta. Inde suha' buttu di kami', Paulus sola Silas* Silas: naua illaam basa Yunani, Silwanus. anna Timotius.
2 Handandanni Puang Allataala Ambeta sola Debatanta Yesus Kristus untamba'koa' anna namana' kamasakkeam sola kamasannangam.
Pa'kuhhusam sumanga' anna sambajam
1:3-12
3 Pahallu kisi'dim la umbaba liukam pa'kuhhusam sumanga' längäm olona Puang Allataala kahana ikoa' inggannakoa' solasubungki. Anna sihatam kipateem aka tuttuam ungkatappa'ikoa' Puang Yesus anna tuttuam sikamase-masekoa'. 4 Iam too anna illaam si mesa-mesa jumaa'na Puang Allataala tä' deem pada satilalla'kam untula'i diona kamanontongammua' anna kamatappasammua' illaam pandahhaam anna pa'sändäsam indo umpassanna'.
5 Indo to umpassangkoa' pandahhaam aka untuhu'ikoa' Puang Allataala naangga'koa' sihatam la tama kapahentaanna. Etam too naongei tandaam anna makaleso diua Puang Allataala uhhotto' ma'hupatau sola ponno kamaloloanna. 6 Aka Puang Allataala la ma'palako situhu' kamaloloanna, nasuhum la umpabala'i pandahhaam lako ingganna to undahhakoa' 7 anna la nalappasangkoa' iko dio mai ingganna kamapi'disammu susi duka' lako kami'. La napateemmi too ke diitam sule Debatantaa' Puang Yesus yabo mai suhuga illaam alla'na api ma'nala-nala sola buda malaika'na to napakuasa. 8 Anna Debata la untahungkum to tä' naaku umpengngissanni Puang Allataala anna lako to moka untahima kaheba katilallasam diona Debatanta Puang Yesus. 9 Tau ia too la natahungkum napasi'dinni pandahhaam mabanda' sule lako salako-lakona. La dihambai ia illaam mai pangkähhäna kakuasaanna Debatanta Puang Yesus 10 ke lambi'um allo kasuleanna la naongei napa'kasallei anna nakapilla'i to matappa', battu diua ingganna umma'na to puha napasähä'. Anna nakala'koa' duka' aka ungkatappa'inna' indo puha kisa'bii illaam alla'-alla'mua'.
11 Iam too anna kipa'sambajangam liungkoa' umba ke malakoa' napesihatangam Puang Allataala Debatantaa' la disangai to puha natambai. La Puang Allataala hi too sola kakuasaanna la umpasule lako pattujummua' umpogau' kamapiaam anna umpasundum ingganna pa'palakoammua' indo puha umpogau' kahana kamatappasammua'. 12 Susim too pa'sambajangki anna mala sanganna Debatanta Puang Yesus dipa'kasallei kahana ikoa', anna ikoa' duka' napa'kasallei Puang Yesus kahana pa'tamba'na Puang Allataala to tapenombai anna Debatanta Yesus Kristus.