1 Ei haꞌi netuduk numa au mai, ma tao tungga au leleo-lalaꞌong. Huu au haꞌi netuduk numa Karistus mai, ma tao tunggan.✡1 Korentus 4:16; Felipi 3:17

2 Au koa ei nahuu talo bee oo, ei masaneda neu au taa-taa boe. Ma basa dedeꞌak fo au anorik soa-neu ei, ei bei tao tunggan. Lolen sudi selik kana! 3 Tehuu hambu dedeꞌak esa fo au nau fee nesenedak neu ei talo ia: boso lilii-ndondou ei dadadin numa bee mai. Touk kamaherek esa-esak naoka nai Karistus fo dadi neu ndia malanggan. Inak dadadin numa touk mai. Ma Karistus numa Manetualain mai.*Hatahori Yunani mana malela dedeꞌak kara rae, kefale “langgak” sosoa-ndandaan nae, 1) ao-inak langgan, ma 2) dadadin, okan (huun). Tehuu nai dedeꞌa Yunani, kefale sosoa-ndandaan, ta “hatahori mana parenda”.

4 Touk boso mboti langgan neu ana hule-haradoi, do, neu ana nafada Lamatuak hara hehelun. Huu, naa sama leo ana nakamamaek Karistus, nahuu ana ta fee hada-horomatak tungga ita siꞌen. 5 Tehuu inak muste mboti langgan neu ana hule-haradoi, do, neu ana nafada Lamatuak hara hehelun. Huu mete ma taa, na, naa sama leo ana nakamamaek ndia saon, nahuu ana ta fee hada-horomatak sama leo ita siꞌen. Ma ana oo nakamamaek ndia ao heli-helin, sama leo mete ma inak nggeu namboli langgan boe. 6 Mete ma hambu inak ta nau mboti langgan fo dadi tanda nae, ana ta fee hada-horomatak neu saon, na, malole lenak ana nggute kekeꞌu ndia langga bulun. Tehuu mete ma nameda langga mbolin naa nakamamaek kana, malole lenak ana mboti langgan leo.

7 Soba duꞌa sudik kana talo ia: touk hae mboti langgan, huu Manetualain adu touk tungga Ndia mata-aon. Huu naa de touk dadi buna-boak fo natudu Manetualain ta neni babanggan. Ma inak oo dadi buna-boak fo natudu touk ta hohoꞌan boe.✡Tutui Makasososak 1:26-27 8 Neu Manetualain adu dae-bafok ia, Ana ta adu touk numa inak mai. Tehuu Ana adu inak numa touk mai. 9 Ma Ana ta adu touk fee inak. Tehuu Ana adu inak fee touk.✡Tutui Makasososak 2:18-19 10 Dadi malole lenak inak mboti langgan, fo hatahori bubuluk rae, ana pake ndia haak fo hule-haradoi ma nafada Lamatuak hara hehelun, tungga ndoon. Ata numa nusa tetuk do inggu temak mai oo bubuluk talo naa boe. 11 Tehuu mete ma ara rakaesa ro Lamatuak, inak ma touk ta rambariik mesa kasa. 12 Makasososan, Manetualain adu inak numa touk mai. Tehuu basa naa, inak bonggi nala touk. Ma Manetualain ndia adu fo basa-basan dadi.

13 Ei duꞌa sudik kana! Mete ma inak hule-haradoi neu Manetualain, ma ta mboti langgan, na, tungga ei, naa malole, do taa? 14 Tungga ei hadam nai kota Korentus, mete ma touk langga bulun manaru, naa nakamamaek kana, do? 15 Tehuu mete ma inak langga bulun manaru, naa lolen sudi selik kana, hetu? Lamatuak feen langga bulu naruk fo mboti nala langgan. Naa, ndia ndaa.

16 Tehuu mete ma hambu ketuk rareresi rakandoo laꞌe-neu dedeꞌak ia, masanenedak te ia ndia dadi neu ai siꞌem ena numa ai fo dadi malanggan ma numa saranik kara mai.

17 Hatematak ia, au ae kokolak dedeꞌak esa bali. Nai dedeꞌak ia, au ta bisa koa ei. Neu ei bei makabua, ei ta tao tungga hata fo ndoos, tehuu ei boe mamue-anggik bali.

18 Makasososan, au amanene rae, neu ei makabua tao ibadat, ei mabingga-baꞌek. Numa au amanene tutuik laꞌe-neu ei nebingga-baꞌem naa mai, neu ko hambu dedeꞌak ketuk tetebes. 19 (Memak, huu no ei tao esa-esak nekebubuan do nekebonggo-bonggon naa, neu ko neni nitak see ndia tebe-tebe namanene neu ita Lamatuan ma see ndia ta nau nenene neun.)

20 Neu ei hatahori saranik makabua fo miꞌa nai Lamatuak mein, ei muste masaneda neu Lamatuak Yesus. Naa, ndia ndaa. Tehuu ei ta tao talo naa. 21 Buktin, ndia neu ei manggatuuk miꞌa, hambu ketuk ta rahani hatahori laen, hambu ketuk raꞌa no bare-naꞌon ma hambu laen bali, rinu mafuk. Losa hatahori laen ta hambu babaꞌek, de ara ndoe. 22 Talo bee ia!? Ei ta maena uma heli-helik fo miꞌa-minu nai naa, do? Do, ei mae makalulutu Manetualain hatahori saranin nade malolen? Do, ei nau makamamaek hatahori mana toꞌa taak kara? Ei nau au kokolak talo bee? Ei nau au koa ei nai dedeꞌak ia, do? Boso mamahena!

23 Lamatuak Yesus mesa kana ndia nafada memak dedeꞌak ia neu au, ma au loo liman bali neu ei. Nae, neu hatahorir rahehere rala fo rae tao risa Ndia, leꞌodaen naa Ana haꞌi nala roti balok esa. 24 De Ana hule-haradoi noke makasi neu Manetualain. Boe ma nafada ana nunin nara nae, “Miꞌa roti ia. Ia Au ao-mbaang. Neu ko ara rakalulutu Au ao-mbaang fee ei. Dadi ei muste miꞌa roti ia fo masaneda neu Au.”

25 Neu ara raꞌa basa ena, Ana oo tao sama neu nggalas oe anggor boe nae, “Oe anggor ia, sosoa-ndandaan ndia: Manetualain nau ndara fangga hehelu-bartaa beuk no ei. Ma Au muste mboꞌa heni Au daang losa Au mate dei, dei fo hehelu-bartaak naa bisa dadi. De tungga-tungga ei minu oe anggor talo ia, na, ei muste masaneda neu Au mamateng.”✡Kalua numa Masir mai 24:6-8; Yermia 31:31-34 26 Tungga-tungga ei manggatuuk miꞌa roti talo ia, ma minu numa nggalas talo ia, losa Lamatuak fali mai, naa sama leo ei tui seluk laꞌe-neu Ndia mamaten.

27 Huu naa de, mete ma hambu hatahori naꞌa roti naa, ma ninu numa nggalas naa mai, fo nasaneda neu ita Lamatuan, tehuu dalen ta ndoos, neu ko Manetualain fee hukun neun. Roti ma oe anggor naa, ndia Lamatuak Yesus ao-mbaan ma daan. Dadi mete ma hatahori dalen ta ndoos, na, ta nandaa ana naꞌa-ninu nai naa, huu naa kada nakadadaek Lamatuak Yesus. 28 Malole lenak, hatahori esa-esak parisa ndia dale heli-helin dei. Basa, mete ma namahere tebe-tebe ndia dalen ndoos, dei fo ana bisa naꞌa roti naa, ma ninu oe anggor naa. 29 Tehuu hambu hatahorir raꞌa ma rinu ro dalen nara ta neulauk. Huu ara duꞌa rae, “Yesus mamaten naa, ta naena sosoa-ndandaak hata esa boe na. Yesus ao-mbaan ta naena sosoa-ndandaak soa-neu au.” Hatahori leo naak kara, mesa kasa lemba-rasaa sosoen, nahuu neu ko ara hambu huku-dokik. 30 Huu naa de, nai ei taladam mara naa, hambu ketuk mana sota-naꞌuk kara, hambu ketuk kamahedik kara, ma hambu ketuk fo mates sara ena.

31 Tehuu mete ma ita parisa tatalolole ita dalen dei, huku-dokik ta laꞌe nala ita talo naa. 32 Mete ma ita Lamatuan hukun ita, Ana tao talo naa, fo nanori ita tungga dalak fo ndoos. Ana ta nau huku-dokik laꞌe ita, ma neu ko takalulutu sama-sama to basa hatahorir marai dae-bafok ia.

33 Dadi toranoo susue nggara ein! Mete ma ei makabua fo miꞌa nai Lamatuak mein, na, esa muste nahani esa. 34 Mete ma hambu ketuk ndoe ralan seli, na, malole lenak raꞌa rala faa nai uma dei. Basa dei fo, mete ma ei makabua sama-sama, na, huku-dokik boso laꞌe nala ei.

Laꞌe-neu dedeꞌak laen nara fo ei matanek naa, neu ko au uni naa neti, dei fo au koladun.