1 Basa boe ma au mete-ita banda kakiki-kakaak esa kalua numa tasi dale mai. Langgan hitu ma susuran salahunu. Ana pake solangga manek esa-esak nai ndia susuran nara. Nai langgan nara raa neni surak dedeꞌa deꞌek nekedadaek neu Manetualain.✡Daniel 7:3; Dae-bafo Beuk 17:3, 7-12 2 Ndia ao-inan, sama leo meo-asu. Ndia ein, sama leo baruang ein. Ma bafan, sama leo singa bafan. Mengge buta naa fee haak neu banda kakiki-kakaak naa fo nanggatuuk neu kadera man-parenda, ma pake basa ndia koasan lalaꞌen.✡Daniel 7:4-6 3 Nai banda kakiki-kakaak naa langgan esa, hambu foa moꞌok, nok bali ana neni tati nitak losa ela baꞌuk ka ana mate, tehuu ta dadi mate. Basa hatahorir marai dae-inak heran mete-rita banda kakiki-kakaak naa ta hohoꞌan, de ara tunggan. 4 Basa boe ma ara oo fee hada-horomatak neu mengge buta naa, ma rakadedemak kana sama leo Manetualain boe, nahuu mengge naa fee koasa neu banda kakiki-kakaak naa ena. Hatahorir raa oo koa-kio banda kakiki-kakaak naa boe rae, “Banda naa, ta hohoꞌak sudi selik kana! Ta hambu esa boe na bisa nasenggin!”

5 Manetualain fee lelak neu banda kakiki-kakaak naa fo ana kokolak koa ao, ma kokolak nakadadaek Manetualain. Banda naa hambu luas fo toꞌu parenda, losa teuk telu seserik (ndia bulak 42). 6 Huu naa de ana kokolak nakatutudak Manetualain naden. Ma ana oo kokolak nakadadaek basa Manetualain hatahorin nara fo mana leo rai nusa tetuk do inggu temak boe.✡Daniel 7:8, 25; 11:36 7 Manetualain oo fee luas neun fo natati laban Manetualain hatahorin nara, losa nasenggi sara boe. Ana oo hambu koasa fo parenda hatahorir numa basa leor, basa hatahori nusak kara, basa dedeꞌak kara, ma basa nusak kara marai dae-inak mai boe.✡Daniel 7:21 8 Huu naa de basa hatahorir marai dae-inak songgo-tanggu banda kakiki-kakaak naa. Sira raa, ndia basa hatahorir fo naden nara ta neni surak nai Bibi Lombo Ana Susuran dale. Fai bakahulun hatahorir rakanisa Bibi Lombo Ana naa ena, tehuu Manetualain tao nasoda falik kana numa mamaten mai. Neu Manetualain bei ta adu dae-bafok ia, Ana surak memak basa hatahori kamaherek kara naden nai susurak naa dale nae, sira raa, ndia neu ko hambu masodak tetebes ta mana ketuk.✡Sosoda Kokoa-kikiok kara 69:29

De Manetualain hatahorin nara boso rakadedeak, te naa dadi neu omba-lelak fo ara rakatataka tungga ma ramahere rakandoo neun na!✡Yermia 15:2; 43:11

11 Basa naa, au mete-ita banda kakiki-kakaak laen, kalua numa dae-inak mai. Susuran dua, sama leo bibi lombo susuran. Ma haran, sama leo mengge buta haran. 12 Ana dadi neu mana toꞌu dedeꞌak soa-neu ndia malanggan, ndia banda kakiki-kakaak kaesan naa, fo fai bakahulun neni tati nitak, de ela baꞌuk ka maten. Ana hambu koasa numa ndia malanggan mai, fo nakasetik basa hatahorir marai dae-inak songgo-tanggu neu ndia malanggan. 13 Ana oo tao tanda heran nara ta hohoꞌak boe, losa-losak ana bisa nakonda aꞌi numa lalai mai, neu hatahori noꞌuk kara matan. 14 No dalak naa, banda kakiki-kakaak nomer kaduan naa, pake ndia malanggan koasan fo pepeko-leleko hatahorir marai dae-inak. Ana oo parenda hatahorir fo doki rala patong esa, sama leo ndia malanggan mata-aon boe, fo ara fee hada-horomatak neu ndia malanggan, fo fai bakahulun neni tatik losa ela baꞌuk ka maten. 15 Manetualain oo fee lelak neu banda mana pepeko-lelekok naa boe, fo fee ani hahaek tao nahori patong naa. No dalak naa, patong naa bisa kokolak, ma fee parenda fo rakanisa hatahori ta mana nau songgo-tanggu neun. 16 Banda mana pepeko-lelekok naa oo nakasetik basa hatahorir fo simbok rala dededek nai sira lima konan, do nai sira odamatan boe. Basa hatahorir, moꞌo-kadiꞌik, kamasuꞌik ma hata taak, mana nekemboꞌik do, ata-dato, basa sara muste simbok dededek naa. 17 Mete ma taa, na, ara ta bisa raseꞌo do rahasak hata esa boe na. Nai dededek naa, neni surak banda kakiki-kakaak nomer kaesan naa naden, ma ndia nomer.

18 Nai ia muste pake utek, ou! Hatahori malelak bisa nalela nomer naa, ndia sosoa-ndandaan. Nomer naa ndia natudu nala hatahori dae-bafok esa, ndia “666”.*Tungga hatahori mana malela laꞌe-neu Susura Malalaok tembo uluk nai naa, nomer “6” sosoa-ndandaan, ndia dedeꞌak ta malole esa, fo ta mana tesa-tamak, do, manggarauk. Dadi nomer “666” ia sosoa-ndandaan nae, “manggarauk mateꞌen”.