15
Ata hitu ruma nusa tetuk do inggu temak mai reni sosoe moꞌok hitu neni dae-inak mai
1 Basa naa, au mete-ita matak ta hohoꞌak esa numa lalai, losa au heran alan seli. Hambu ata hitu ruma nusa tetuk do inggu temak mai, esa-esak toꞌu koasa fo haitua sosoe moꞌok neni dae-inak mai. Sosoe kahituk kara iar, sosoe mateꞌen nara siran ena. Mete ma basa sara dadi ena, na, sosoa-ndandaan nae, Manetualain dalen makasufu ena, de Ana ta namanasa seluk hatahori dae-bafok bali.
2 Basa boe ma au mete-ita tasi mana mbilak sama leo titiro babalik no aꞌi. Au oo mete-ita hatahori noꞌuk ka rambariik rai tasi naa tatain boe. Sira raa, hatahori fo ta mana tungga banda kakiki-kakaak naa, ta songgo ndia patong, ma ta simbok ndia dededen. Basa sara toꞌu bua kaliik sama leo sasandu, fo ara simbon numa Manetualain mai. 3 De ara soda-helo sosodak esa numa baꞌi Musa mai, fo ndia Manetualain hatahori neondan lele uluk. Hatahori raa oo soda-helo fo koa-kio neu Yesus boe. Fai bakahulun hatahorir rakanisan, sama leo hatahorir hala bibi lombo ana nai Manetualain Uma Huhule-haradoin, fo tao rakasufu Ndia dalen. Ara soda-helo rae,*Musa surak nala sosodak naa neu faik fo Manetualain nuni no hatahori Israꞌel asa kalua numa Masir mai, fo sira mamana doidoson naa.
“Ai koa-kio Manetualain!
Ai makadedemak Manetualain naden!
Huu Manetualain koasan sudi selik kana.
Ma Manetualain ta neni babanggan heran sudi selik kana.
Manetualain toꞌu parenda-koasa neu basa hatahori nusak kara marai dae-inak ena.
Manetualain dadi Manek soa-neu basa leor marai dae-bafok ena.
Basa hata fo Manetualain aduk, sudi selik kana!
Manetualain ue-osan, lolen seli!
Manetualain eno-dalan, ndoos sudi selik kana.
Manetualain masodan, tetebes mateꞌen!✡Kalua numa Masir mai 15:1-18
4 Basa hatahorir rakadedemak Manetualain naden,
basa hatahorir koa-kio Manetualain malolen.
Huu kada Manetualain mesa kana malalaok.
Ma kada Manetualain mesa kana ta naena salak.
Neu ko basa hatahori nusak kara mai rakaluku-rakatele neu Manetualain.
Neu ko basa leor mai roke makasi neu Manetualain.
Huu basa hatahorir mete-rita Manetualain ue-osa neulaun ena.
Ma basa hatahorir bubuluk Manetualain dale ndoon ena.”✡Yermia 10:7; Sosoda Kokoa-kikiok kara 86:9
5 Neu hatahorir raa soda-helo basa, boe ma au mete-ita Kama Malalaok Mateꞌen naa nai Manetualain Uma Huhule-haradoin manai nusa tetuk do inggu temak, ma ndia tema ririndin neni soi loak.✡Kalua numa Masir mai 38:21 6 Boe ma au mete-ita ata kahituk kara raa ruma nusa tetuk do inggu temak mai fo mana reni sosoe kahituk kara raa. Ara kalua ruma Uma Huhule-haradoik mai. Ara pake bua-loꞌa muti manggadilak lao ndoos, ma ara pake ndae aruk fo taon numa lilo mbila isik mai. 7 Basa de au mete-ita esa numa horis ta hohoꞌak kahaak kara raa mai, fo marai Manetualain kadera man-parenda boboan, baꞌe bokor lilo mbilas hitu fee ata kahituk kara raa. Bokor kahituk kara raa, esa-esak neni isik no huku-dokik numa Manetualain mai. Ndia mana masodak seku neu. Ana nahani a fo fee nasa-ododedein neni dae-inak mai. 8 Ta dook ka boe ma Uma Huhule-haradoik naa sofek no aꞌi masuk fo kalua numa Manetualain ta neni babanggan ma koasan mai. Ta hambu hatahori esa boe na bisa maso neni naa neu. Ata kahituk kara raa muste mboꞌa rakababasak sosoe kahituk kara raa reni dae-inak mai, dei fo hatahori bisa maso reni naa reu.✡Kalua numa Masir mai 40:34; 1 Mane-manek kara 8:10-11; 2 Israꞌel no Yahuda Tutui Bakahulun 5:13-14; Yesaya 6:4
*15:3 Musa surak nala sosodak naa neu faik fo Manetualain nuni no hatahori Israꞌel asa kalua numa Masir mai, fo sira mamana doidoson naa.
✡15:3 Kalua numa Masir mai 15:1-18
✡15:4 Yermia 10:7; Sosoda Kokoa-kikiok kara 86:9
✡15:5 Kalua numa Masir mai 38:21
✡15:8 Kalua numa Masir mai 40:34; 1 Mane-manek kara 8:10-11; 2 Israꞌel no Yahuda Tutui Bakahulun 5:13-14; Yesaya 6:4