18
Manetualain atan tui kota Babel ndendefan
1 Basa naa, au mete-ita Manetualain atan laen esa konda numa nusa tetuk do inggu temak mai. Ana naena koasa ma saꞌak ta hohoꞌak, losa tao manggaledo basa dae-inak. 2 Ana pake hara moꞌok fo nafada nae,
“Ndefa henin ena! Ndefa henin ena! Kota Babel ndefa henin ena!
Rua henin ena! Rua henin ena! Kota ta hohoꞌak naa, rua henin ena!
Ana dadi neu nitur mamana leleon ena.
Ana dadi neu basa dula-dale manggarauk kara dae huun ena.
Ana dadi neu basa mbui kaar mana raꞌa nenetuk mamana nekebuan ena.
Ana dadi neu basa banda manggarauk kara lalaen ena.✡Yesaya 21:9; Yermia 51:8; Dae-bafo Beuk 14:8; Yesaya 13:21; Yermia 50:39
3 Ndefa henin ena, nahuu basa hatahori nusa-nusak kara marai dae-inak,
soa mai rinu mafuk numa ndia anggor mai.
Rua henin ena, nahuu basa leor marai dae-bafok,
soa mai sunda-pandai ro kota naa hatahorin.
Mane-manek kara ruma basa nusak kara mai,
mai hohongge-helena ruma naa.
Hatahori mana danggan ruma basa kotar mai,
mai raseseꞌo losa ara ramasuꞌi ena.
Huu kota naa sama leo inak fo mana soa hasa basa hata fo neulaun lenak.
Huu kota naa sama leo ina petak fo mana soa sangga basa hata fo malada-malada.”✡Yesaya 23:17; Yermia 51:7
4 Basa de au amanene harak laen esa bali nanggou numa lalai mai nae,
“Wei! Basa Au hatahoring nggara ein!
Kalua malai laꞌo ela naa leo!
Laꞌo ela kota naa leo!
Boso tao tungga kota naa hatahorin manggaraun,
fo boso hambu mala sira huku-dokin boe.✡Yesaya 48:20; Yermia 50:8; 51:6; 45
5 Huu manggaraun nara
noꞌun seli ena.
Ma salan nara
ratuni-ratana suu losa lalai ena.
Hatematak ia Manetualain ta lilii
sira leleo-lalaꞌo manggaraun ena bali.
Hatematak ia Manetualain nahani a ena
fo nau huku-doki sara.✡Tutui Makasososak 18:20-21; Yermia 51:9
6 De ei muste bala manggaraun nara,
sama leo ana tao manggarauk neu hatahori laen ena.
Tehuu ei muste bala sara,
losa lipa laꞌe dua.
Fai bakahulun ara kedi-ira hatahori,
losa rinu numa sira manggo tee lilo mbilan mana sofek no anggor doidosok mai.
Tehuu hatematak ia sira mesa kasa ndia muste rinu
anggor doidosok naa, losa lipa laꞌe dua.✡Sosoda Kokoa-kikiok kara 137:8; Yermia 50:29
7 Ara tao rala aon nara sama leo hatahori ta hohoꞌak.
Ma ara rakadedemak aon nara ena.
Ara nau kada soda-lada neulauk.
Ara hii kada malada-malada a mesan.
Huu naa de ara muste hambu susa-sona berak.
De ara muste leo-laꞌo no doidosok
Huu fai bakahulun ara kokolak koa ao sama leo ina petak nae,
‘Au ia, ina manek!
Neu ko au ta dadi uu ina falu!
Neu ko au ta buꞌi akarereu.
Neu ko au ta pake bua-loꞌa nggeok.’
8 Ara kokolak talo naa losa Manetualain namanasa sara ena.
Losa Manetualain nau hukun asa ena.
Neu ko nai kada faik esa dalen,
ara rameda ndoe ralan seli,
ara buꞌi rakarereu,
ma ara oo mate nduahadak boe.
Losa hatahori piru heni sara reni aꞌi dale reu.
Losa aꞌi naꞌa nabasa ao-mbaa mamaten nara.
Huu Manetualain mana koasa mateꞌen, ndia fee huku-dokik ia.
Ma Manetualain ta neni babanggak mateꞌen, ndia naketu-naladi dedeꞌak ia.✡Yesaya 47:7-9
9 Fai bakahulun mane-manek kara mai
hohongge-lelena ro kota naa hatahorin nara,
ma soda-ladan nara neulauk nai naa.
Neu ko ara mete-rita masuk hene numa aꞌi naa mai,
neu ko ara bubuluk rae aꞌi naꞌa heni basa kota naa ena.
Basa de ara buꞌi rakarereun.
10 Boe ma aon nara mumuru mete-rita hatahorir raa doidoson.
Tehuu ara rambarani rambariik ruma kada dook ka mai.
Ma ara rambarani mete ruma kada naa mai.
Boe ma ara kokolak rae,
‘Awii! Kasian Babel, ee!
Awii! Kasian kota ta hohoꞌak!
Nai kada liꞌu esak ka dalen, o hambu hukun ena.
Nai kada ta doo anak ka te lulutuk nala o ena.’✡Yeskiel 26:16-17
11 Ramanene talo naa, boe ma hatahorir fo fai bakahulun ruma basa mamanak kara mai fo danggan numa naa,
ara oo tungga buꞌi rakarereu boe.
Huu ta hambu hatahori esa boe na,
nau neu hasa sira bua neseseꞌon nara bali.✡Yeskiel 27:31; 36
12 Ta hambu hatahori esa boe na, nau neu hasa
sira bua heti aon numa lilo mbilas, lilo fulak,
batu manggadilak, do, poemata mai bali.
Ta hambu hatahori esa boe na, nau neu hasa
sira tema lenan, tema sutra,
do, tema bangganaꞌuk laen nara fo mbilas, do, mbila maranggeok.
Ta hambu hatahori esa boe na, nau neu hasa
sira buan numa ai kaboo menik, nggadi noli neni dokik,
do, ai neni dokik laen nara mai.
Ta hambu hatahori esa boe na, nau neu hasa
sira buan numa riti, besi, do, batu marmar mai.
13 Ta hambu hatahori esa boe na, nau neu hasa
sira ai makeen, do, ai rou makeek mata-matak.
Ta hambu hatahori esa boe na, nau neu hasa
sira ai daa kaboo menin, do, mina kaboo menik mata-matak.
Ta hambu hatahori esa boe na, nau neu hasa
sira oe anggor, mina setun,
tarigu, do, hade-nggandum.
Ta hambu hatahori esa boe na, nau neu hasa
sira sapin, bibi lombon, do, ndaran.
Ta hambu hatahori esa boe na, nau neu hasa
sira karetan,
do, sira ata-daton nara.✡Yeskiel 27:12; 13; 22
14 Neu ko hatahori mana danggan nara raa fale dalen nara rae,
‘Awii, Babel, ee!
Awii, kota ta hohoꞌak!
O bua-baꞌu neulaum mara fo o hatahorim mara hii rala sara seli naa,
ta sara ena.
Basa-basan mopo sara ena, losa sira dadi reu hata taak kara ena,
losa ranggananaro.’
15 Fai bakahulun hatahori danggan nara raa ramasuꞌi nahuu kota naa fo sama leo ina petak.
Tehuu hatematak ia ara fale dalen nara ta ramaketu ena.
Ara ramataꞌu ralan seli,
mete-rita kota naa hatahorin doidoson.
Sira aon nara mumuru ralan seli,
mete-rita sira huku-dokin.
Tehuu ara rambarani mete ruma kada dook ka mai.
Ara rambarani rambariik ruma kada naa mai.
16 Boe ma ara kokolak rae,
‘Awii! Kasian Babel, ee!
Awii! Kasian kota ta hohoꞌak!✡Yeskiel 27:31; 36
Fai bakahulun o hatahorim pake bua-loꞌa bangganaꞌuk mbilas, do, mbila maranggeok
numa tema mabeli mateꞌen mai.
Fai bakahulun o hatahorim heti aon nara ro lilo mbilas, poemata,
ma batu manggadilak mabeli mateꞌen.
17 Tehuu nai kada liꞌu esak ka dalen,
o bua-baꞌum mara ta sara ena.
Nai kada ta doo anak ka,
o suꞌim mara mopo basa sara ena!’
Fai bakahulun oo ofak kapatein nara ma ofak isin nara
saꞌe ofak reu-mai ruma kota naa mai.
Tehuu hatematak ia ara rambarani see ruma kada dook ka mai.
Ma hatematak ia ara rambarani mete ruma kada naa mai.✡Yesaya 23:14; Yeskiel 27:26-30
18 Ara ranilu masuk mana kalua numa aꞌi dale mai.
Boe ma ara bubuluk rae, aꞌi naꞌa nabasan ena.
Boe ma ara fale dalen, de kokolak rae,
‘Awii kasian! Neu ko ta hambu kota laen
fo ta hohoꞌak sama leo Babel bali.
Awii kasian! Neu ko ta hambu kota laen,
fo neulaun sama leo ndia bali.’✡Yeskiel 27:32
19 Ara raꞌu afu fo sombun neu langgan nara,
nahuu dalen nara sona.
Ara buꞌi rakarereu,
nahuu dalen nara rakalulutu.
Boe ma ara kokolak rae,
‘Awii! Kasian Babel, ee!
Awii! Kasian kota ta hohoꞌak!
Ai saꞌe ofak miu-mai meni bua-baꞌu fee o ena,
losa ai oo mamasuꞌi boe.
Ai lemba-baꞌu meni o fufuam mara ena,
losa ai oo tungga soda-lada neulaun boe.
Tehuu nai kada liꞌu esak ka dalen,
basa naar, mopo heni sara ena.
Nai kada ta doo anak ka,
basa naar, rakalulutu heni sara ena.’✡Yeskiel 27:30-34
20 Boe ma harak naa kokolak seluk bali nae,
‘Wee, ei mana leo-laꞌo nai nusa tetuk do inggu temak!
Ei dalem mara ta parluu ranoso bali.
Wee, Manetualain hatahorin nara!
Ei dalem mara ta parluu rameda susa bali.
Wee, Lamatuak nedenun nara ein!
Naa fo ei dalem mara mbena sau-sau.
Wee, Manetualain mana toꞌu dedeꞌan nara ein!
Naa fo ei dalem mara ramahoko.
Fai bakahulun Babel nakasususak ei.
Fai bakahulun kota naa tuni-ndeni ei.
Tehuu hatematak ia Manetualain bala ei doidosom ena.
Hatematak ia Ana bala kota naa manggaraun ena.’ ”✡Tui Seluk laꞌe-neu Dala Masodak 32:43; Yermia 51:48
21 Basa boe ma au mete-ita ata esa numa nusa tetuk do inggu temak mai, barakain seli. Ana mai koꞌo nala batu esa, baꞌu sama leo hatahori esa. Boe ma ana mbesi batu naa neni tasi dale neu. Ana oo nafada boe nae,
“Neu ko ara oo rakalulutu Babel talo naa boe.
Neu ko ara oo tao ramopo kota ta hohoꞌak naa talo naa boe.✡Yermia 51:63-64; Yeskiel 26:21
22 Ta hambu hatahori esa boe na,
fo rakaminak bua kaliik nai kota naa.
Ta hambu hatahori esa boe na,
fo namanene sasandu, nggitar, sulik,
ma toꞌik liin nai kota naa bali.
Ta hambu tukan esa boe na,
fo naue-osa tungga ndia ue-tataon bali.
Ta hambu hatahori esa boe na,
fo mbau hader nai kota naa bali.✡Yeskiel 26:13; Yesaya 24:8
23 Ta hambu hatahori esa boe na,
fo ana dede lambu nai kota naa bali.
Ta hambu hatahori esa boe na,
fo tao feta kabin nai naa bali.
Fai bakahulun kota naa mana maseꞌo-hahasa bua-baꞌur,
ramasuꞌi ralan seli ena.
Fai bakahulun Babel hatahori mana danggan nara,
soda-ladan nara neulauk ralan seli ena.
Tehuu ara pake malela makiuk,
fo kedi-ira hatahori rai dae-inak.
Ara pake modo balu mata,
fo pepeko-leleko hatahori nai dae-bafok.✡Yermia 7:34; 25:10
24 Babel hambu hukun berak ia ena,
nahuu ana soa nakanisa Manetualain mana toꞌu dedeꞌan nara.
Kota ta hohoꞌak naa nakalulutu ena,
nahuu ana soa tuni-ndeni Manetualain hatahorin nara losa mate.
Hambu Manetualain hatahorin ketuk oo hambu nekenisak nai mamana laen nara boe.
Tehuu Babel ndia muste lemba-nasaa basa salak kara raa.
Kota ta hohoꞌak naa ndia muste lemba-nasaa neselu-netaan.”✡Yermia 51:49
✡18:2 Yesaya 21:9; Yermia 51:8; Dae-bafo Beuk 14:8; Yesaya 13:21; Yermia 50:39
✡18:3 Yesaya 23:17; Yermia 51:7
✡18:4 Yesaya 48:20; Yermia 50:8; 51:6; 45
✡18:5 Tutui Makasososak 18:20-21; Yermia 51:9
✡18:6 Sosoda Kokoa-kikiok kara 137:8; Yermia 50:29
✡18:8 Yesaya 47:7-9
✡18:10 Yeskiel 26:16-17
✡18:11 Yeskiel 27:31; 36
✡18:13 Yeskiel 27:12; 13; 22
✡18:16 Yeskiel 27:31; 36
✡18:17 Yesaya 23:14; Yeskiel 27:26-30
✡18:18 Yeskiel 27:32
✡18:19 Yeskiel 27:30-34
✡18:20 Tui Seluk laꞌe-neu Dala Masodak 32:43; Yermia 51:48
✡18:21 Yermia 51:63-64; Yeskiel 26:21
✡18:22 Yeskiel 26:13; Yesaya 24:8
✡18:23 Yermia 7:34; 25:10
✡18:24 Yermia 51:49